Klopp ræddi mögulegt kraftaverk, áföll og aðdáun sína á óvæntum tækifærum

Endurhæfing Virgil van Dijk hefur gengið vel og það var orðrómur í gangi um að hann myndi ná að spila með Liverpool undir lok tímabilsins en hann sleit krossband í leik á móti Everton í október.

Síðan þá hefur Klopp þurft að horfa á eftir hverjum lykilmanninum á fætur öðrum enda á meiðslalistanum. Nú síðast varð það ljóst að Joel Matip spilar ekki meira á leiktíðinni en auk Van Dijk þá hefur Joe Gomez líka verið lengi frá.

Fabinho er líka meiddur og því algjört miðvarðarhallæri. Liverpool keypti hins vegar Ben Davies frá Preston á lokadegi gluggans og fékk Tyrkjan Ozan Kabak á láni frá Schalke.

Klopp sagðist hafa þurft þessa nýju menn því liðið væri nú aðeins einum meiðslum frá því að hafa engan til að spila í miðverðinum. Þýski knattspyrnustjórinn var síðan spurður út í stöðuna á Virgil van Dijk og hvort að hollenski miðvörðurinn verði á listanum yfir þá leikmenn sem Liverpool hafi heimild fyrir að nota á lokakaflanum.

„Ef það er pláss fyrir hann, þá verður Virgil á þeim lista. Enginn læknir hefur sagt mér að það sé möguleiki á því að hann spili aftur á þessu tímabili. Ég vil ekki segja að það sé ómögulegt en það er ekki líklegt,“ sagði Jürgen Klopp.

„Ef að það er ekkert pláss á listanum þá þurftum við að taka ákvörðun. Ef hann verður með á leikmannalistanum þá er það bara af því að við erum að vonast eftir kraftaverki. Ekkert meira en það,“ sagði Klopp.

Joel Matip meiddist á móti Tottenham og nú er ljóst að hann missir af restinni af tímabilinu.

„Ég á erfitt með að finna orðin til að lýsa því. Það er ótrúlegt hvað þessir strákar hafa lent í. Þetta er mikið, mikið áfall fyrir okkur alla. Við erum ekki aðeins að missa leikmann af vellinum í þessa mánuði heldur erum við einnig að missa mann úr klefanum,“ sagði Klopp.

„Þetta var mjög mikil óheppni. Tæklingin hans á Son Heung-Min var góð tækling og hann spilaði áfram. Svo þegar við ætluðum að teipa hann upp aftur þá bólgnaði ökklinn upp. Það er ekkert gott hægt að segja um það,“ sagði Klopp.

Það má búast við því að Davies og Kabak fái fyrsta tækifærið fljótlega en Klopp sagði þó að það væri ólíklegt að báðir myndu byrja á móti Brighton á Anfield í kvöld.

„Ég er mikill aðdáandi óvæntra tækifæra og þetta er tækifæri fyrir þá báða sem og félagið. Við verðum að vera klókir og hugsa hratt því við spilum öðruvísi en Preston og Schalke. Þeir þurfa tíma sem við höfum ekki mikið af. Það væri ekki gott ef þeir þyrftu að byrja á morgun en ég held að við gefum þeim nokkra daga til viðbótar,“ sagði Klopp.