Uppljóstrari vill hæli á Íslandi

Breska dagblaðið Guardian birti í gær viðtal við 29 ára Bandaríkjamann, Edward Snowden, en í viðtalinu kemur fram að það var Snowden sem á dögunum lak gögnum í fjölmiðla um umfangsmikla njósnastarfsemi bandarískra stjórnvalda.

Gögnin leiddu í ljós að Þjóðaröryggisstofnun Bandaríkjanna (NSA) safnar gögnum frá mörgum af stærstu netfyrirtækjum Bandaríkjanna án heimildar frá fyrirtækjunum. Nefnist verkefnið PRISM og leitast NSA við að komast yfir gögn um leitarsögu einstaklinga, tölvapóst, spjallsamskipti og skjöl sem sett hafa verið á netið.

Safnar NSA gögnum frá meðal annars Microsoft, Facebook, Google, Yahoo, Skype og Apple. Snowden hefur síðustu ár starfað sem verktaki fyrir NSA á Havaí en hann hefur nú komið sér fyrir í Hong Kong.

Segir Snowden í viðtalinu að bandarísk stjórnvöld muni án efa reyna að fá hann framseldan til Bandaríkjanna þar sem hann verði að öllum líkindum ákærður fyrir lekann. Fyrir vikið er Snowden í leit að landi sem er tilbúið að veita honum pólitískt hæli. Segir hann Ísland efst á sínum lista enda hafi landið orðspor fyrir að hampa netfrelsi.