Heimir: Erum með betra fótboltalið

ÍBV vann í kvöld 1-0 sigur á írska liðinu St. Patrick's í forkeppni Evrópudeildarinnar, 1-0, en þó stóð það oft tæpt hjá Eyjamönnum í leiknum. Heimir Hallgrímsson, þjálfari liðsins, segir að liðið verði að nota sína styrkleika betur í seinni leiknum.

„St. Patrick's er með sterkt lið og ef leikmenn fá að spila sinn leik þá eru þeir erfiðir viðureignar. Þeir vilja gefa marga langa bolta fram á völlinn og eru með mikið af fyrirgjöfum. Enda eru þeir sterkir í loftinu og við áttum oft í vandræðum með þá þegar þeir fengu hornspyrnur og aukaspyrnur,“ sagði Heimir.

„Ef við förum að spila þennan leik - að gefa langar sendingar - þá lendum við í vandræðum. En um leið og við settum boltann niður á jörðina og fórum að láta hann ganga manna á milli mátti sjá að við erum með betra fótboltalið.“

„Það þýddi lítið að spila þessum löngu boltum fram þar sem við erum með frekar lágvaxna leikmenn. Þeir eru hins vegar með tveggja metra menn í hverri stöðu og töpum við því alltaf á þannig spilamennsku.“

Fyrri hálfleikur var slakur af hálfu beggja liða og segir Heimir að sínir leikmenn hafi greinilega verið taugaóstyrkir. „Við þurfum að vera betur einbeittir í seinni leiknum. Það var vandamál í dag - kannski af því að þetta var fyrsti Evrópuleikurinn hjá langflestum af okkar leikmönnum. Auðvitað er smá spenna í ungum mönnum fyrir svona leik en hún er vonandi farin og við getum spilað betur í seinni leiknum á Írlandi.“

„Af þessum leik að dæma finnst mér að við eigum að geta komist áfram. En svo getur vel verið að þeir hafi átt slæman dag og komi sterkari til leiks á heimavelli. 1-0 forysta er ekki stór en engu að síður jákvætt að við héldum hreinu.“

Áður en kemur að síðari leiknum í Írlandi mæta Eyjamenn liði Fjölnis í bikarnum á sunnudaginn. Heimir segir að þétt dagskrá og mikil ferðalög eigi að hafa áhrif á sína menn. „Einhverjir höfðu áhyggjur af því að við værum að spila fjóra leiki á tíu dögum en ég sagði við peyjana í morgun að það væri eins og að fara á Þjóðhátíð og hafa áhyggjur af mánudögum. Maður fer á Þjóðhátíð til að skemmta sér og maður er þá ekki að velta fyrir sér hvað gerist á mánudeginum.“

„Við erum í toppbaráttu í úrvalsdeild, í átta liða úrslitum í bikar og í Evrópukeppninni. Ef menn eiga ekki að hafa gaman að því - hvenær þá?“