Umfjöllun: Valsarar tóku Keflvíkinga í kennslustund

Valsarar tóku Keflvíkinga í kennslustund suður með sjó í kvöld. Frá fyrstu mínútu til hinnar síðustu voru Keflvíkingar í eltingaleik við spræka Valsara sem unnu að lokum 2-0 sigur. Lokatölurnar gefa þó ekki rétta mynd af yfirburðum Valsmanna sem voru algjörir.

Strax frá fyrstu mínútu var ljóst í hvað stefndi. Valsarar mættu mun ákveðnari til leiks og tóku öll völd á vellinum. Þeir léku boltanum vel sín á milli og nýttu breidd vallarins vel. Á köntunum voru þeir Arnar Sveinn Geirsson og Jón Vilhelm Ákason sérstaklega sprækir og áttu varnarmenn Keflvíkinga í mestu vandræðum með þá.

Valsmenn komust yfir með marki úr vítaspyrnu um miðjan fyrri hálfleikinn og óhætt að segja að forystan hafi verið verðskulduð. Keflvíkingar sluppu líka með skrekkinn því líklega hefði Kristinn Jakobsson átt að vísa Guðjóni Árna varnarmanni Keflvíkinga af velli fyrir að brjóta á Jóni Vilhelm sem var fyrir opnu marki. Sem betur fer fyrir Valsmenn skoraði Guðjón Pétur Lýðsson úr spyrnunni. Valsmenn marki yfir í hálfleik.

Síðari hálfleikurinn var nánast spegilmynd af hinum fyrri. Valsarar sköpuðu sér fjölmörg færi og ef ekki hefði verið fyrir stórleik Ómars Jóhannssonar í marki Keflavíkur hefðu lokatölurnar orðið skrautlegar. Hann gat þó ekkert gert á 59. mínútu þegar Pól Justinussen smellhitti boltann á lofti með hægri fæti utarlega í teignum. Boltinn small í slánni, niður á línuna, aftur í slána og inn. Stórglæsilegt mark.

Það sem eftir lifði leiks reyndu Keflvíkingar að klóra í bakkann en tókst ekki að skapa sér nein færi. Í þau skipti sem þeir fjölmenntu á vallarhelming Valsmanna fengu þeir hröð upphlaup í bakið. Andri Fannar Stefánsson, Rúnar Már Sigurjónsson og Christian Mouritsen fengu allir færi til þess að bæta við mörkum en Ómar sá við þeim öllum.

Lokatölurnar 2-0 og Valsarar komnir í 2. sæti deildarinnar tveimur stigum á eftir KR. Keflvíkingar eru hins vegar í 8. sæti með átta stig og þurfa að bæta sinn leik ef ekki á illa að fara í sumar.

TölfræðiSkot (á mark): 8-22 (2-11)

Varin skot: Ómar 8 – Sindri Snær Jensson 2

Horn: 3-7

Aukaspyrnur fengnar: 13-7

Rangstöður: 1-4

Dómari: Kristinn Jakobsson 5.