Ill meðferð á íslenskum hestum vekur óhug í Svíþjóð

Fréttir af skelfilegri meðferð á tuttugu íslenskum hestum hefur vakið mikla athygli í Svíþjóð. Eigandi hestanna var þangað til í gær formaður hestafélagsins Gyda í Sandvik en það er hópur áhugamanna um íslenska hestinn. Heilbrigðisyfirvöld komust hinsvegar á snoðir um að maðurinn, Inge Johanson, færi vægast sagt illa með sín eigin hross. Myndir hafa nú verið birtar af dýrunum og eins og sjá má á þeim eru þau hrikalega illa haldin.

Hófar þeirra eru úr sér vaxnir og líklegast hafa þeir ekki verið tálgaðir í heilt ár með tilheyrandi kvölum fyrir dýrin. Þá hefur ekki verið mokað undan hestunum í langan tíma og var svo komið að þeir þurftu að lúta höfði til þess að rekast upp undir loftið í hesthúsinu. Að auki hefur þeim ekki verið hleypt út í langan tíma. Johanson hafði ekki skráð hestana eins og lög gera ráð fyrir og því mun verða erfitt að koma þeim í verð eftir að þeim hefur verið komið til heilsu, takist það á annað borð.

Í sænska dagblaðinu Arbetarbladet segir að dýralæknirinn sem hafi komið að hesthúsinu hafi ekki séð jafn slæma meðferð á dýrum á þeim 25 árum sem hann hefur unnið við dýralækningar.

Johanson var í miklum metum á meðal hestamanna á svæðinu og því hafa fréttirnar af slæmri umhirðu komið öllum í opna skjöldu. Hann hafði unnið hörðum höndum að því að skipuleggja stóra hestasýningu á næsta ári þar sem keppa átti í ístölti í fyrsta sinn í Svíþjóð.