Enn ólga eftir dauðadóm Saddams

Þrír bandarískir hermenn voru drepnir í dag og útgöngubann er enn í gildi í Bagdad annan daginn í röð, í kjölfar þess að Saddam Hussein var dæmdur til hengingar í gær. Bush Bandaríkjaforseti hreykir sér af því að hafa tekið rétta ákvörðun þegar hann sendi Bandaríkjaher til að steypa Saddam af stóli og draga hann fyrir dóm, til að vinna flokki sínum kosningafylgi.

Ákvörðun hæstaréttar Íraks, sem Bandaríkin styðja við bakið á, hefur verið mjög umdeild og réttarhöldin gagnrýnd af mannréttindasamtökum. Leiðtogi Demókrata í öldungadeild bandaríska þingsins, Harry Reid, segir Íraka hafa fengið "ringulreið í staðinn fyrir harðstjóra". Flokksmenn gagnrýna Bush fyrir að hafa komið bandarískum hermönnum í þá stöðu sem þeir eru í í Írak núna, þar sem vaxandi ofbeldi milli trúarhópa verður sífellt fleiri hermönnum að bana og fátt gefur tilefni til bjartsýni í hinu nýstofnaða lýðveldi í Írak.