Fituskattur afnuminn

Dönsk stjórnvöld ætla að afnema sérstakan skatt sem lagður var á matvæli sem hafa að geyma mettaða fitu yfir 2,3 prósenta mörkum.

Skatturinn hækkaði verð á smjöri, ýmsum mjólkurafurðum og unnum kjötvörum. Verð á þessum matvörum hækkaði meira en góðu hófi gegnir að mati stjórnvalda og skaðaði jafnframt matvælaframleiðslu í Danmörku en ein afleiðing skattsins var að Danir fóru í auknum mæli yfir landamærin til Þýskalands til að kaupa smjör og önnur feit matvæli.

Skatturinn var fyrst innleiddur í október í fyrra sem tæki í neyslustýringu en danska heilbrigðisráðuneytið hefur upplýst að 47 prósent Dana séu of þung og 13 prósent glími við offitu.