Oliver ræðst gegn „feitustu borgum“ Bandaríkjanna

Heilu borgirnar í Bandaríkjunum fá brátt að finna fyrir kokkinum Jamie Oliver og megrunarráðum hans.

Kokkurinn klæðalausi, eins og hann kallar sig í sjónvarpsþáttum sínum í bresku sjónvarpi, hefur nú bundist samkomulagi við ABC-sjónvarpsstöðina bandarísku um nýja þáttaröð þar sem Oliver ferðast til nokkurra af óheilbrigðustu borgum Bandaríkjanna, eins og það er orðað, og setur ofátinu stólinn fyrir dyrnar með linnulausri megrunarráðgjöf og hollustukennslu.

Að minnsta kosti sex klukkustundir af slíku sjónvarpsefni eru væntanlegar og hugsanlega meira ef Bandaríkjamenn taka sönsum og ná stjórn á ummálinu áður en í virkilegt óefni er komið - sem margir vilja nú meina að hafi gerst fyrir löngu þar vestra. Oliver er sagður græða á feiknagóðu orðspori sínu og þátta sinna í Bretlandi og muni það skila honum miklu í þáttunum á ABC.

Bandaríkjamenn hafa verið iðnir við að hugsa upp raunveruleikaþætti sem tengjast offitu og er þáttur ABC hugsaður sem svar við þætti NBC, The Biggest Loser, þar sem þátttakendur keppa í megrun fyrir framan myndavélarnar. Nafn nýju þáttaraðarinnar liggur ekki fyrir enn sem komið er og ekki hefur heldur verið birtur listi yfir feitustu borgir Bandaríkjanna en hans er þó beðið með eftirvæntingu.