Færri snúa aftur í fangelsin hér en á Norðurlöndunum

„Við erum svo heppin með það að 76 prósent af þeim sem losna úr fangelsum hér á landi eru ekki búnir að fá nýjan dóm eftir 2 ár. Hlutfallið er miklu hærra á hinum Norðurlöndunum," segir Erlendur Baldursson, afbrotafræðingur hjá Fangelsismálastofnun.

Nú stendur yfir ráðstefna norræna afbrotavarnarráða sem haldin er hér á landi. Þar koma saman sálfræðingar, félagsfræðingar og afbrotafræðingar sem eru að vinna á sviði afbrotavarna. Ráðstefnan hér er haldin á vegum Ríkislögreglustjóra.

„Við erum að skoða hvaða leiðir eru í boði til að hindra afbrot. Ég fjallaði í dag um endurkomurannsókn, því það er okkur öllum fyrir bestu að þeir sem fara í fangelsi komi ekki aftur þangað. Við komum næst best út úr þessari rannsókn, sem var framkvæmd á öllum Norðurlöndunum, einungis Norðmenn komu betur út en við," segir Erlendur.

„Það ber þó að taka það fram að af þeim sem gegndu samfélagsþjónustu þá komu fæstir til baka á Íslandi. Þetta eru svona þeir hlutir sem við höfum verið að ræða síðustu daga; hvað við getum gert til að minnka endurkomur. Afhverju eru menn að koma aftur í fangelsi? Og hvað getum við gert til að hindra það að fólk fari út í afbrot."

Aðspurður hvað sé hægt að gera til að koma í veg fyrir að þeir sem hafa afplánað hljóti annan dóm og sitji aftur í fangelsi, vísar Erlendur í fyrirlestur norskrar konu á ráðstefnunni.

„Hún var að tala um hvernig við getum hindrað það að fólk fari út í afbrot. Þá nefndi hún sem dæmi fjölskyldu þar sem mamman og pabbinn hafa verið í vandræðum, og eignast barn. Frá fyrsta degi sem barnið fæðist þá komi einhver í heimsókn, hjúkrunarfræðingar, félagsfræðingar eða sálfræðingar og veiti fjölskyldunni stuðning, til að koma í veg fyrir að börnin leiðist út í afbrot. Þetta virðist vera eina pottþétta aðferðina til að menn lendi ekki í afbrotum á lífsleiðinni," segir hann.

Svona aðferð er dýr en Erlendur bendir á að fangelsisvist sé einnig dýr. „Það er stundum svolítið seint þegar þú ert kominn í fangelsi og búinn að vera í tómu messi og vitleysu þar til þú lendir í fangelsi. Ef þú getur gripið inn í fyrr, þá er það bara gott mál."

Ráðstefnunni lýkur á morgun en þá er Litla Hraun heimsótt þar sem Margrét Frímannsdóttir kynnir þá starfsemi sem er í gangi þar.