Gætu hindrað ráðningu yfirmanns FBI

Leiðtogi demókrata í öldungadeild Bandaríkjaþings, Chuck Schumer, segir að Demókratar íhugi að neita því að kjósa nýjan yfirmann FBI, alríkislögreglu Bandaríkjanna, fyrr en sérstakur saksóknari er skipaður til að skoða tengsl Trumps forseta við Rússland.

Samkvæmt frásögn Reuters liggur ekki fyrir ákvörðun um hvað Demókratar gera, en verið er að skoða þetta ráð til að knýja á um rannsókn á áhrifum Rússa á bandarísku forsetakosningarnar í haust.

Það vakti hörð viðbrögð í síðustu viku þegar Trump rak James Comey, yfirmann FBI. Stofnunin hefur verið að rannsaka meint afskipti Rússa af forsetakosningunum og mögulega tengingu milli stjórnvalda í Moskvu og framboðs Trump.