Gular viðvaranir um nánast allt land vegna snjókomu og storms

Sunna Kristín Hilmarsdóttir skrifar 30. nóvember 2020 07:14

Það verða gular viðvaranir í gildi um nánast allt land í kvöld og fram á nótt eða þar til í fyrramálið. Vísir/Hanna

Gular viðvaranir taka gildi á öllu landinu í kvöld fyrir utan höfuðborgarsvæðið, Norðurland eystra og Austurland að Glettingi. Varað er við hvassviðri eða stormi með ofankomu og má búast við 15 til 23 metrum á sekúndu með snjókomu og síðar slyddu.

Viðvaranirnar gilda fram á nótt á Suðurlandi, Breiðafirði og Faxaflóa en á Suðausturlandi og Austfjörðum þar til annars vegar klukkan sex í fyrramálið og hins vegar til klukkan sjö.

Þá er viðvörun jafnframt í gildi til klukkan sex í fyrramálið á Miðhálendinu, til klukkan fimm í fyrramálið á Vestfjörðum og til klukkan 4:30 í fyrramálið á Ströndum og Norðurlandi vestra.

„Suðaustan 15-23 með snjókomu og síðar slyddu. Fer síðan yfir í rigningu um nóttina. Erfið akstursskilyrði,“ segir á viðvörunarvef Veðurstofunnar um þessar gulu viðvaranir.

Í dag verður hins vegar hæglætisveður á landinu, dálítil él norðantil framan af degi en annars víða bjart að því er segir í hugleiðingum veðurfræðings á vef Veðurstofunnar.

„Eftir hádegi kemur lítið lægðardrag upp að suðausturströndinni með snjókomu á Suðausturlandi og á Austfjörðum.

Vaxandi suðaustanátt seinnipartinn, 15-20 m/s og snjókoma suðvestantil í kvöld, en síðar slydda og rigning eftir því sem hlýnar í kvöld og nótt.

Skilin ganga yfir landið í kvöld og nótt með hvassviðri og snjókomu í flestum landshlutum og gular við varanir eru í gildi á öllu landinu að Norðurlandi Eystra og Austurlandi að Glettingi undanskildum.

Í fyrramálið snýst síðan í allhvassa suðvestanátt með skúrum og hægt kólnandi veðri. Um miðja vikuna snýst í norðanátt með snjókomu norðantil og kólnandi veðri um allt land,“ segir í hugleiðingum veðurfræðings.

Veðurhorfur á landinu:

Hæg breytileg átt, en norðvestan 5-13 m/s á Austfjörðum fram að hádegi. Lítilsháttar él norðantil, annars bjart með köflum, en snjókoma suðaustantil seinnipartinn. Frost 0 til 4 stig.

Vaxandi suðaustanátt, þykknar upp og hlýnar seint í dag, 10-20 í kvöld og snjókoma en síðar slydda, hvassast með suðurströndinni.

Fer að rigna í nótt, fyrst suðvestantil. Snýst í suðvestan 13-20 með skúrum, en léttir til norðaustanlands. Hiti 2 til 7 stig, en kólnar annað kvöld.

Á þriðjudag (fullveldisdagurinn):

Allhvöss eða hvöss sunnan- og síðar suðvestanátt með rigningu og hita 1 til 8 stig, mildast með suðurströndinni. Kólnar smám saman síðdegis með skúrum eða éljum, en léttir til norðaustanlands.

Á miðvikudag:

Allhvöss eða hvöss norðanátt og snjókoma norðantil, en heldur hægari vindur og víða él syðra. Frost 0 til 8 stig.

Á fimmtudag:

Útlit fyrir allhvassa norðnátt og snjókomu, en úrkomulítið sunnan heiða. Frost 4 til 12 stig, kaldast in til landsins.

Á föstudag:

Minnkandi norðanátt og snjókoma norðantil, en bjartviðri sunnanlands. Hiti breytist lítið.

Veður