Biden vex ásmegin í könnunum

Joe Biden, forsetaframbjóðanda Demókrataflokksins, hefur vaxið ásmegin í skoðanakönnunum sem gerðar hafa verið í kjölfar kappræðna hans og Donalds Trump, forseta. Líkur hans á því að ná kjöri hafa aukist en Demókratar hafa áhyggjur af aðgerðum Repúblikana til að draga úr kjörsókn.

Fylgi frambjóðendanna hefur verið mjög stöðugt undanfarna mánuði en heilt yfir hafa sigurlíkur Bidens aukist og útlit er fyrir að þær hafi batnað töluvert í kjölfar kappræðanna.

Í könnun sem CNN birti í dag segjast 57 prósent líklegra kjósenda að þeir séu líklegri til að kjósa Biden á meðan 41 prósent þeirra segist líklegri til að kjósa Trump. Sami miðill gerði sambærilega könnun meðal skráðra kjósenda í ágúst september og þá var Biden með átta prósentustiga forskot á Trump 51-43.

Samkvæmt nýrri könnun Monmouth í Pennsylvaníu sem opinberuð var í dag, er Biden með ellefu prósentustiga forskot á Trump meðal skráðra kjósenda.

Hér lýsir Nate Silver, ritstjóri tölfræðimiðilsins FiveThirtyEight, því hvernig meðaltal kannana í Pennsylvaníu lítur út þessa dagana. Biden er með 6,6 prósentustiga forskot á Trump.

Í nýlegri könnun NBC og Wall Street Journal mældist Biden með 53 prósenta fylgi meðal skráðra kjósenda á landsvísu og Trump með 39 prósent.

Sama hvert litið er, þá er þróunin sú sama. Biden virðist vaxa ásmegin á meðan fylgi Trumps dalar. Trump sjálfur tjáði sig um könnun Monmouth í kvöld þar sem hann lýsti yfir furðu sinni á því að Biden væri að mælast svo vel í Pennsylvaníu og sagði ósatt um hvar Biden stendur varðandi þrjú  málefni sem Trump nefndi.

„Ég mun sigra í Pennsylvaníu,“ lýsti Trump yfir.

Fyrir kosningarnar 2016 gáfu kannanir í skyn að Hillary Clinton myndi sigra Trump. Svo varð ekki. Hún fékk fleiri atkvæði á landsvísu, sem var í takt við kannanir, en hann fékk fleiri kjörmenn með mjög naumum sigrum í nokkrum mikilvægum ríkjum. Í þeim kosningum var þar að auki mikið af kjósendum sem sögðust óákveðnir en kusu Trump.

Óákveðnum kjósendum hefur fækkað verulega síðan þá. þar að auki er útlit fyrir að óákveðnir kjósendur hallist frekar að Biden en Trump.

Í spálíkani FiveThirtyEight hafa líkur Biden á að ná kjöri aukist á undanförnum dögum. Spálíkanið byggir á könnunum, bæði heilt yfir landið og í einstökum ríkjum.

Í síðustu viku voru líkur Biden 78 prósent en nú eru líkur hans 82 prósent. Líkur Trump á því að ná endurkjöri eru 17 prósent, samkvæmt spálíkaninu.

Mun fleiri dómsmál en áður

Þrátt fyrir þessar vendingar hafa áhyggjur Demókrata aukist undanfarna daga. Þær hafa aukist vegna fregna um viðleitni íhaldsmanna til að draga úr kjörsókn í mikilvægum ríkjum og þá sérstaklega hjá markhópum sem þykja hliðhollir Demókrötum.

Samkvæmt frétt Politico sýna rannsóknir að þeldökkir kjósendur og kjósendur af latneskum ættum, eiga erfiðara með að kjósa en aðrir. Þá sýna rannsóknir einnig að þessir erfiðleikar og strangar reglur um skilríki og atkvæðagreiðslu gefi hvítum og hægri sinnuðum kjósendum meira vægi.

Þá segir þar einnig að á þessu ári hafi fleiri lögsóknir tengdar kosningum verið háðar en á síðustu tveimur áratugum. Demókratar hafa beitt meirihluta þessara lögsókna til að reyna að fá hinar ýmsu aðgerðir íhaldsmanna felldar niður. Þar á meðal eru reglur um skilríki og atkvæðagreiðslu, utankjörfundaratkvæði, hreinsanir af kjörskrá og margt annað.