Freyr í viðtali fyrir leik: „Spennandi að sjá strákinn gegn þeim allra bestu“

„Við erum að henda mönnum í djúpu laugina en menn stækka oft við svona verkefni,“ segir Freyr Alexandersson, aðstoðarlandsliðsþjálfari, fyrir leikinn við Belgíu sem hefst kl. 18.45 á Stöð 2 Sport. Viðtalið má sjá hér að neðan.

„Það eru margar breytingar á liðinu og mörg tækifæri sem leikmenn fá í dag. Við horfðum á þetta þannig að við vildum hafa eins hátt orkustig og kostur væri á,“ segir Freyr en þeir Andri Fannar Baldursson, 18 ára, og Hólmbert Aron Friðjónsson fá til að mynda tækifæri í byrjunarliði Íslands.

„Við sjáum þetta líka sem kjörið tækifæri til að skoða fleiri leikmenn. Við erum á þannig stað með liðið að það er fínt að skoða leikmenn í djúpu lauginni. Þetta er svo sannarlega djúpa laugin. Við teljum að Andri Fannar sé tilbúinn í þetta verkefni. Hann er búinn að standa sig gríðarlega vel á æfingum og það verður spennandi að sjá strákinn gegn þeim allra, allra bestu í heiminum,“ segir Freyr.

„Við erum mjög spenntir að sjá Hólmbert. Hann er fullur sjálfstrausts, strákurinn. Kemur inn á æfingar með mikil gæði og er ótrúlega öflugur í að klára færin sín. Hann er auðvitað hraustur og með góðan skrokk. Jón Daði, sem er hin hreinræktaða nían okkar, eyddi mikilli orku í Englandsleikinn og af hverju ekki að gefa Hólmberti sénsinn, fullum af orku? Sjá hvað hann færir liðinu hér í kvöld,“ segir Freyr.

Kjörið tækifæri til að sjá Ögmund spreyta sig

Ögmundur Kristinsson fær tækifæri í marki Íslands, en Rúnar Alex Rúnarsson og Patrik Gunnarsson verða á bekknum. Hannes Þór Halldórsson fór ekki með til Belgíu.

„Ögmundur hefur ekki enn fengið tækifæri til að byrja undir stjórn Erik Hamrén og var að koma af mjög sterku tímabili með sínu félagsliði. Hann er reyndar búinn að skipta um lið og kominn í stórlið [Olympiacos] núna. Frammistaða hans síðasta vetur var til fyrirmyndar og þetta er kjörið tækifæri til að sjá hann spreyta sig. Þetta hefur í raun lítið með Rúnar Alex að gera. Við höfum gefið honum tækifæri og hann hefur nýtt þau vel, en það var kominn tími til að Ögmundur fengi sénsinn,“ segir Freyr.

Ísland mun leika með fjögurra manna varnarlínu eins og oftast áður, en kom til greina að spila með þrjá miðverði og nota vængbakverði?

„Það kom til greina og við skoðuðum það. Við gerðum það hér síðast og það gekk í rauninni mjög vel. En við ákváðum að fara þessa leið, með þessa blöndu. Reyna að loka þessum vösum sem þeir leita í með sína hágæðaleikmenn, en um leið langaði okkur að sjá aðra leikmenn sem eru ekki beint hæfir til að spila vængbakvarðastöðurnar. Við komumst því að þessari niðurstöðu á endanum og teljum að þetta leikkerfi geti hentað vel í þeirri baráttu sem framundan er í kvöld.“