„Bernskubrek fullorðinna“ skýrir arnarhvarf á Egilsstöðum

Atli Ísleifsson skrifar 11. ágúst 2020 14:05

Listamaður Arnarins er Grétar Reynisson. Örninn hefur staðið undanfarin þrjú ár við Fagradalsbraut á Egilsstöðum. Fljótsdalshérað.

Tréörninn sem hvarf úr miðbæ Egilsstaða fyrr í mánuðinum er kominn í leitirnar.

Lögreglan á Austurlandi greinir frá þessu en verkið, sem ber heitið „Örninn“ var stolið að morgni 4. ágúst síðastliðinn.

Í tilkynningu segir að eftirgrennslan lögreglu hafi leitt í ljóst að erninum hafi verið „skilað“ þremur dögum síðar.

„Hann fannst þá við þjóðveg 1, við hringtorg á Kirkjubæjarklaustri. Hann er nú í vörslu lögreglunnar á Suðurlandi og bíður heimferðar. Skemmdir urðu við þjófnaðinn á stöpli er örninn sat á en verkið sjálft er talið óskemmt.

Líkur benda til að þarna hafi verið um bernskubrek fullorðinna að ræða. Málið er í rannsókn,“ segir í tilkynningu.

Örninn er 70 sentimetrar á hæð og 50 kíló á þyngd. Listamaður verksins er Grétar Reynisson og hefur örninn staðið undanfarin þrjú ár við Fagradalsbraut á Egilsstöðum.

Lögreglumál Fljótsdalshérað Styttur og útilistaverk

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.