Innlent

Gul við­vörun á morgun

Stefán Ó. Jónsson skrifar
Það mun blása hressilega á suðausturlandi á morgun.
Það mun blása hressilega á suðausturlandi á morgun. veðurstofa íslands

Þrátt fyrir hægviðri í dag ættu landsmenn að vera undir hvassviðri búnir. Veðurstofan hefur gefið út gula viðvörn fyrir suðausturhornið sem tekur gildi strax á þriðja tímanum í nótt. Þar er búist við snörpum vindhviðum við fjöll, yfir 35 m/s, t.d. undir Öræfajökli og við Reynisfjall.

Þetta getur skapað hættuleg akstursskilyrði, sérílagi fyrir ökutæki með aftanívagna og eiga ökumenn á ferðalagi austur um verslunarmannahelgina því að vera vakandi.

Það verður hins vegar hægur vindur í dag, bjart með köflum norðaustanlands og stöku síðdegisskúrir, en skýjað og úrkomulítið í öðrum landshlutum. Hiti 10 til 18 stig, hlýjast á Norðausturlandi.

Djúp lægð nálgast síðan úr suðri á morgun. Henni fylgir stíf austan- og norðaustanátt, en hvassviðri eða stormur suðaustanlands fram eftir degi sem fyrr segir. Gera má ráð fyrir rigningu um allt land og að það verði talsverð eða mikil úrkoma á Austfjörðum og Suðausturlandi.

Lægðin mun áfram láta á sér kræla á laugardag en þá verður hún skammt suður af landinu. Áfram má því búast við talsverðri rigningu suðaustantil og skúrum á vestanverðu landinu, en norðaustanlands ætti hanga þurrt.

Veðurhorfur á landinu næstu daga

Á föstudag:

Austan og norðaustan 8-15 m/s, en 15-23 við SA-ströndina fram eftir degi. Rigning með köflum, en talsverð eða mikil rigning á SA-landi og Austfjörðum. Dregur úr vindi um kvöldið. Hiti 8 til 16 stig, hlýjast um landið V-vert.

Á laugardag:

Suðaustan 8-13 m/s A-til og norðaustan 8-13 á Vestfjörðum, annars hægari vindur. Þurrt að kalla NA-lands, talsverð rigning á SA-landi og dálítil væta í öðrum landshlutum. Hiti 10 til 18 stig, hlýjast NA-lands.

Á sunnudag:

Breytileg átt og skúrir, en rigning A-lands. Hiti 9 til 16 stig.

Á mánudag (frídagur verslunarmanna):

Norðlæg eða breytileg átt og skúrir, hiti breytist lítið.

Á þriðjudag:

Norðaustanátt og dálítil væta N-lands, en líkur á síðdegisskúrum á S-verðu landinu. Hiti 8 til 17 stig, hlýjast SV-til.

Á miðvikudag:

Útlit fyrir svipað veður áfram.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.