Varnarmaður Derby, Andre Wisdom, var í gærkvöldi á sjúkrahúsi eftir stunguárás rétt fyrir utan Liverpool, nánar tiltekið í bænum Toxteth, en árásin átti sér stað á laugardag.

Atvikið átti sér einungis stað nokkrum tímum eftir 2-1 sigur á Reading þar sem Wisdom spilaði allan leikinn en hann var einnig rændur í umræddri árás.

„Hann var stunginn og er á sjúkrahúsi. Hann er í jafnvægi og hinn bróðir minn er á leiðinni  þangað. Þetta er ótrúlegt. Ég get ekki trúað þessu,“ sagði systir hans í samtali við The Sun.

Heimildir enskra miðla segja að þetta hafi gerst þegar hann steig út úr bíl sínum við heimili sitt en Wisdom kom í gegnum yngri lið Liverpool. Hann spilaði sinn fyrsta leik árið 2012.

Eftir að honum mistókst að slá í gegn á Anfield, þá fór Wisdom til Derby árið 2017 og hefur spilað þar síðan. Hann hefur spilað yfir 100 leiki fyrir félagið en Derby er nú þremur stigum frá umspilssæti.