Erlent

Óeirðum fjölgar enn í Bandaríkjunum

Samúel Karl Ólason skrifar
Lögregluþjónar takast á við mómtælendur í New York.
Lögregluþjónar takast á við mómtælendur í New York. AP/Seth Wenig

Umfangsmiklar óeirðir brutust út í mörgum borgum Bandaríkjanna í nótt. Víða kom til átaka á milli mótmælenda og lögreglu og hafa fregnir borist af slösuðum og særðum á báðum hliðum. Margir ríkisstjórar Bandaríkjanna hafa kallað út þjóðvarðliðið vegna óeirðanna og talið er að minnst fjórir séu látnir vegna óeirðanna. Þetta var fimmta nótt mótmæla og óeirða.

Undanfarna daga hafa þúsundir komið saman í Bandaríkjunum til að mótmæla eftir að svartur maður sem hét George Floyd dó í haldi lögreglu. Mótmælin og óeirðirnar hafa svo að miklu leyti snúist um það hvað svartir menn eru líklegir til að vera drepnir af lögreglu almennt.

Þrátt fyrir að útgöngubann hafi verið sett á víða var víðast hvar ekki farið eftir þeim.

Sjá einnig: Útgöngubann vegna óeirða í kjölfar lögregluofbeldis

Flest mótmæli gærdagsins fóru friðsamlega fram en þegar leið á kvöldið breyttust mótmæli í óeirðir víða um Bandaríkin eins og fram kemur í umfjöllun AP fréttaveitunnar.

Í Philadelphia særðust minnst þrettán lögregluþjónar í óeirðum og kveikt var í fjölda lögreglubíla. Þar voru fjölmargir eldar kveiktir í nótt. Í Salt Lake City særðist lögregluþjónn þegar hann var barinn í höfuðið með hafnaboltakylfu. Víða hafa lögregluþjónar skotið gúmmí- og piparkúlum að mótmælendum.

Þá kom til mikilla átaka í New York. Hér að neðan má sjá myndefni sem tökumenn AP tóku í Washington DC, Minneapolis, New York og Los Angeles.

Embættismenn og sérfræðingar sem fjölmiðla ytra hafa rætt við segjast ekki sjá fyrir sér að óeirðirnar muni hætta á næstunni.

Sjá einnig: Íslensk kona í Minneapolis segir íbúa slegna

Þjóðvarðlið var kallað út í Washington DC til að verja Hvíta húsið. Donald Trump, forseti, varði mest öllum deginum í Flórída að fylgjast með fyrsta mannaða geimskoti Bandaríkjanna í tæpan áratug. Þegar hann lenti í þyrlu forsetaembættisins á lóð Hvíta hússins um kvöldið, neitaði hann að tala við blaðamenn sem biðu hans.

Bandamenn forsetans hafa þrýst á hann og beðið hann um að tjá sig um stöðuna og reyna að taka stjórn á ástandinu. Hann hefur þó sýnt lítinn vilja til þess og hefur þess í stað sent frá sér umdeild ummæli á Twitter þar sem hann hefur hvatt embættismenn og öryggissveitir til að taka á mótmælendum af hörku.

Forsetinn hefur sömuleiðis varið miklu púðri í að gagnrýna Demókrata eins og borgarstjóra Minneapolis.

Það hefur vakið athygli að embættismenn kenna utanaðkomandi fylkingum um ofbeldið í Minnesota. Þeir kenna þó mismunandi fylkingum um. Leiðtogar Minnesota, eins og Tim Walz, ríkisstjóri, segja fjar-hægri hópa og nýnasista hafa nýtt mótmælin í borginni til að ýta undir ofbeldi og ná fram pólitískum markmiðum sínum.

Sjónir embættismanna hafa einnig beinst að glæpasamtökum og jafnvel erlendum aðilum á vegum ríkja eins og Rússlands, sem hafa verið sakaðir um að nota samfélagsmiðla til að ýta undir deilur.

William Barr, dómsmálaráðherra, hefur hins vegar sagt að fjar-vinstri hópum sé um að kenna og hótaði hann því að taka harkalega á þeim. Donald Trump hefur tekið undir þau ummæli.

Hvorugir aðilar hafa þó getað varpað fram sönnunum fyrir staðhæfingum þeirra og gögn frá Minneapolis sýna að lang flestir þeirra sem hafa verið handteknir hafa verið heimamenn.


Tengdar fréttir

Útgöngubann vegna óeirða í kjölfar lögregluofbeldis

Minnst sex ríki hafa óskað eftir stuðningi þjóðvarðliðs Bandaríkjanna til að bregðast við auknum óeirðum í kjölfar andláts George Floyd, sem lést í haldi lögreglunnar í Minneapolis eftir að lögreglumaður hélt hné sínu að hálsi hans í tæpar níu mínútur.

Lögregluþjónninn ákærður vegna dauða Floyd

Lögregluþjónninn Derek Chauvin hefur verið handtekinn vegna dauða George Floyd. Floyd lést eftir að Chauvin hélt honum niðri með því að halda hné sínu á hálsi hans.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.