Tvær nýjar brýr yfir Þjórsá í bígerð á þessu og næsta ári

Tvær nýjar brýr yfir Þjórsá, sem nú eru í bígerð í tengslum við virkjanaframkvæmdir, gætu haft mikla þýðingu fyrir samgöngur og ferðaþjónustu í uppsveitum Suðurlands. Brú á móts við Árnes styttir vegalengdir um tugi kílómetra milli efstu byggða í Árnes- og Rangárvallasýslu. Þetta kom fram í fréttum Stöðvar 2.

Það hefur lengi verið draumur Sunnlendinga að fá brú yfir Þjórsá á móts við þorpið Árnes. Með slíkri brú yrði aðeins sjö kílómetra leið fyrir íbúana þar til að heilsa upp á næstu nágranna sína handan ár í Rangárvallasýslu, í stað þess að aka sextíu kílómetra leið.

Vonir voru raunar bundnar við það sumarið 2009, þegar stefndi í virkjanaframkvæmdir, að brúarsmíðin hæfist þá um haustið, eins og fram kom í þessari frétt Stöðvar 2 frá þeim tíma:

Sjá einnig hér: Vonast til að smíði nýju Þjórsárbrúarinnar hefjist í haust

En núna gæti farið að hylla undir framkvæmdir því forstjóri Landsvirkjunar upplýsti í vikunni að fyrirtækið stefndi að ákvörðun fyrir áramót um hvort hefja ætti undirbúningsframkvæmdir vegna Hvammsvirkjunar.

„Á svipaðan hátt og við höfum gert í síðustu virkjunum, í Búrfelli, Þeistareykjum og á Búðarhálsi, þá svona nokkrum árum áður en við byrjuðum framkvæmdirnar, þá fórum við í aðstöðusköpun, - vegagerð og annað,“ segir Hörður Arnarson forstjóri.

Sjá einnig hér: Ný akleið opnast milli Mývatns og Húsavíkur

Smíði brúar yfir Þjórsá ofan við fossinn Búða ásamt lagningu tengivega við þjóðvegakerfið myndi þá hefjast á næsta ári.

„Þetta mundi nýtast virkjuninni en mundi ekki hvað síst nýtast nærsamfélaginu og skapa, held ég, mikil samlegðaráhrif þarna í sveitinni,“ segir Hörður.

Landsvirkjun hefur raunar á hálfrar aldar starfstíma sínum lagt alls um 650 kílómetra af vegum eða sem samsvarar hálfum hringveginum.

Sjá nánar hér: Vegir Landsvirkjunar á við hálfan hringveginn í lengd

„Allar svona framkvæmdir gerum við í samráði við Vegagerðina. Við höfum gert marga vegi hér á Íslandi, erum núna meðal annars að gera Þeistareykjaveg, - með hringtengingu þar frá Þeistareykjum í Mývatnssveit. Svo afhendum við Vegagerðinni veginn þar á eftir,“ segir forstjóri Landsvirkjunar.

En Landsvirkjun áformar líka aðra brú yfir Þjórsá, á móts við Búrfell ofan við Þjófafoss, sem smíða á í sumar.

Sú brú verður þó ekki fyrir bíla heldur fyrir gangandi vegafarendur og hestamenn, ætluð til að tryggja almenningi aðgang að Búrfellsskógi og fögru útvistarsvæði þar í kring, samhliða því sem ökuleið um Búrfellsstöð verður lokað af öryggisástæðum.

Hér má sjá frétt Stöðvar 2: