Fílar eru gáfaðri en við héldum

Fílar stóðust nýlega mikilvægt gáfnapróf í Bronx-dýragarðinum í New York í Bandaríkjunum: þeir þekktu sjálfan sig í spegli. Það virðist smáatriði fyrir mannfólkið en fyrir utan okkur mennina eru það einungis simpansar, höfrungar - og núna fílar, sem átta sig á því að þeirra eigin spegilmynd er ekki annað dýr.

Ein fílakýrin sem var sett fyrir framan spegilinn notaði spegilmynd sína til að þreifa á hvítu x-i sem hafði verið málað á ennið á henni. Fílarnir fóru allir beint að speglinum þegar þeim var sleppt út í stíuna þar sem hann var en hefðu þeir haldið að þarna væri ókunnur fíll á ferð, þá hefði verið eðlileg hegðun að fílarnir sneru upp á sig og forðuðust nýja fílinn.

Vísindamennirnir segja að síðan hafi fílarnir tekið að rannsaka spegilinn, þefað mikið af honum án þess að reka upp nein hljóð, þó að þessir fílar séu ekki hljóðlátir að jafnaði. Þá hafi fílarnir hreyft sig fyrir framan spegilinn til þess að kanna hvernig spegilmyndin brygðist við. Ein kýrin hafi togað í vinstra eyrað á sér, önnur hafi teygt hálsinn í átt að speglinum og síðan dregið höfuðið til baka á víxl, allir fílarnir hafi einnig rekið ranana upp í munninn. Þetta er það sem kallast sjálfhverf hegðun fyrir framan spegil, líkt og þegar manneskjur líta í spegil til að laga útlitið eða stanga úr tönnum eða annað slíkt.

Þessi hegðun er gjörólík því sem má sjá til dæmis þegar kettlingur hoppar endurtekið á spegil eða páfagaukur goggar í spegilmynd sína eins og til að flæma burt ókunnugan fugl.

Þessi uppgötvun mun væntanlega leiða til þess að aðrir dýraatferlisfræðingar geri samsvarandi tilraunir á öðrum dýrategundum.