Stjórnarmaður segir af sér

Noel White, stjórnarmaður hjá Liverpool, hefur sagt af sér eftir að upp komst um þáttöku hans í orðrómi sem fór á kreik í síðustu viku um að Rafael Benitez væri valtur í sessi sem knattspyrnustjóri liðsins.

Ónefndur stjórnarmaður var sagður heimildamaður eins bresku blaðanna í síðustu viku sem fyrst sagði frá því að Rafael Benitez væri líklegur til að taka pokann sinn ef gengi Liverpool færi ekki að batna á næstu vikum.

White hefur nú viðurkennt að hafa verið maðurinn sem kom sögunni af stað, án þess að nokkur fótur hafi verið fyrir henni. Vegna þessara mistaka í starfi hafi hann ákveðið að segja af sér.

"Heiðurs míns vegna hef ég ákveðið að segja af mér. Ég biðst afsökunar á öllum þeim vandræðum sem ummæli mín kunna að hafa valdið félaginu og starfsfólki þess," sagði White í dag en hafði þar til í dag setið í stjórn Liverpool í 21 ár.

Þykja þessi tíðindi úr Liverpool staðfesta endanlega þann mikla stuðning sem Rafael Benitez hefur í starfi sínu sem knattspyrnustjóri og má gera ráð fyrir að allt slúður um mögulega brottvikningu hans séu úr lausu lofti gripnar.