Al-Jazeera sjónvarpar á ensku frá og með 15. nóvember

Arabíska sjónvarpsstöðin Al-Jazeera mun hefja útsendingar á ensku þann 15. nóvember, til viðbótar við fréttir og fréttatengt efni á arabísku. Al-Jazeera verður þá fyrsta alþjóðlega sjónvarpsstöðin á ensku sem hefur höfuðstöðvar í Miðausturlöndum, nánar tiltekið í Doha í Katar. Auk þess á sjónvarpsstöðin myndver í London, Washington og Kuala Lumpur.

Nýja stöðin verður formlega opnuð á 10 ára afmæli arabísku systurstöðvarinnar sem vakti gríðarlega athygli á alþjóðavettvangi þegar hún sýndi ávarp frá Osama bin Laden eftir árásirnar á Tvíburaturnana þann 11. september. Í arabaheiminum er stöðin þekkt fyrir vægðarlausan fréttaflutning, flott útlit og djarfa spjallþáttastjórnendur sem hafa óhræddir snert við viðkvæmum taugum og feimnismálum í arabaheiminum.

Samkvæmt tilkynningu frá Al-Jazeera mun stöðin í upphafi ná til um 80-100 milljón heimila í gegnum gervihnatta- og kapalsjónvarp.