Allt að 79.000 taldir af

Stórir eftirskjálftar riðu yfir pakistanska Kasmír í gær og fylgdu þeim skriðuföll. Nú er talið að allt að 79.000 manns hafi farist í skjálftanum mikla 8. október. Asif Iqbal Daudazi, upplýsingamálaráðherra Norðvesturhéraðsins svonefnda, greindi frá því í gær að 37.958 manns hefðu látist í hamförunum fyrr í mánuðinum. Þá upplýstu stjórnvöld í pakistanska Kasmír að í það minnsta fjörtíu þúsund manns hefðu farist þar. Þegar við bætast þeir sem létust í Indlandi er ljóst að fjöldi látinna slagar nú hátt í áttatíu þúsund. Í gær riðu svo tveir stórir skjálftar yfir héraðið, annar 5,6 stig og hinn 5,8. Ekki er vitað um tjón á mönnum og munum af þeirra völdum en fregnir hafa borist af miklum skriðuföllum í kjölfarið. Pervez Musharraf, forseti Pakistans skorar á þjóðir heims að leggja til fleiri tjöld og tilheyrandi búnað til að koma megi bráðabirgðaþaki yfir höfuð þeirra milljóna manna sem misstu heimili sín í hamförunum.