Heimir Guðjóns: Þeir voru betri á öllum sviðum

Heimir Guðjónsson þjálfari FH var ekki ánægður með 3–1 tap á Hásteinsvellinum. Hann vildi kenna viljaleysi sinna manna um hvernig fór en leikur FH-inga var einstaklega slappur í dag.

 

„Eyjamenn voru bara mikið sterkari en við í þessum leik á öllum sviðum knattspyrnunnar. Þeir voru mikið betri og grimmari í fyrri hálfleik, á undan í alla bolta og spiluðu bara töluvert betur.“

“Það var ekkert í þeirra leik sem kom mér á óvart. Málið var bara að þeir voru mikið ákveðnari.“

FH-ingarnir voru máttlausir og það virkaði á leik þeirra eins og þeir væru þreyttir. Pressuðu lítið og náðu sínum leik aldrei á strik. Sigur Eyjamanna virtist því aldrei í hættu eftir að þeir komust yfir.

„Ég get ekki farið að kenna neinni þreytu um leik okkar í dag. Við spiluðum á miðvikudaginn og það er sunnudagur í dag þannig að það á ekki að vera að hrjá okkur. Við vorum bara ekki nógu viljugir og Eyjamennirnir nýttu sér það.“