Hjónabönd samkynhneigðra lögleidd

Kanada varð í gærkvöldi fjórða landið í heiminum til að lögleiða hjónabönd samkynhneigðra. Öldungadeild kanadíska þingsins samþykkti þetta á þriðjudagskvöldið og í gærkvöldi skrifaði svo forseti hæstaréttar landsins undir lögin. Samkvæmt þeim gilda nú allar sömu reglur um samkynhneigð pör og gagnkynhneigð. Fyrst um sinn verða samkynhneigðir líklega að láta sér borgaralega vígslu nægja í mörgum tilvikum því að prestum verður ekki gert skylt að gefa saman samkynhneigt fólk, nema þeir vilji. Kaþólska kirkjan í Kanada hefur mótmælt lögunum harðlega. Meirihluti almennings í landinu er hins vegar hlynntur lögunum.