Aron klúðraði víti er Ajax komst í úrslit

Kolbeinn Sigþórsson og félagar í Ajax komust í kvöld í úrslit hollensku bikarkeppninnar er þeir lögðu Íslendingaliðið AZ Alkmaar af velli í undanúrslitum.

Lokatölur 0-1 fyrir Ajax en það var Daninn Lasse Schöne sem skoraði eina mark leiksins.

Þetta var mikill átakaleikur. Ajax missti mann af velli með rautt spjald á 33. mínútu er AZ fékk dæmt víti. Aron Jóhannsson tók vítið fyrir AZ en honum brást bogalistin.

Jafnt var svo í liðum í upphafi síðari hálfleiks er AZ missti mann af velli með rautt spjald.

Kolbeinn Sigþórsson lék allan leikinn fyrir Ajax. Aron Jóhannsson var tekinn af velli á 64. mínútu og þá kom Jóhann Berg Guðmundsson af bekknum hjá AZ.