Þykir siðlaust að ófrískar konur láti sjá sig á almannafæri

Tyrkneski lögfræðingurinn Omar Tugrul Inancer gerði tyrkneska tístara æfa nú á dögunum eftir að hann sagði í sjónvarpi, að það að ófrískar konur færu út á meðal almennings væri siðferðilega rangt.

Inancer hefur staðið við orð sín þrátt fyrir hin háværu mótmæli twitter-notenda. „Það að tilkynna þungun með háværum trompethljóðum er ókurteisi. Þær ættu ekki að flækjast um göturnar með svona bumbur. Það er ekki fallegt,“ sagði hann. Þetta kemur fram á tyrkenska fjölmiðlinum Hurriyet daily news. Hann segir það vansæmandi að ófrískar konur fari nú ekki aðeins í bíltúr með mönnum sínum eða út á kvöldin heldur komi einnig allar fram í sjónvarpi. „Þetta er ekki raunsætt. Þetta er siðleysi.“

Twitter-notendur í Tyrklandi létu í sér heyra eftir að Inancer lét ummælin falla. Stjórnmálamenn tóku undir með tísturunum, þar á meðal Mehmet Oktay, formaður stjórnmálaflokks þar í landi.