Levy: Bale verður ekki seldur

Gareth Bale, vængmaður Tottenham, er einn heitasti leikmaðurinn í dag og öll stóru félögin eru sögð vera að íhuga tilboð í kappann. Stjórnarformaður Spurs, Daniel Levy, hefur nú lýst því yfir að það komi ekki til greina að selja leikmanninn.

Levy segir að það skipti engu máli hversu hátt tilboð komi í leikmanninn. Hann verði ekki seldur.

"Við erum félag sem kýs síður að selja sína bestu leikmenn. Bæði Berbatov og Carrick áttu tvö ár eftir af samningi sínum og vildu komast frá félaginu. Þess vegna voru þeir seldir," sagði Levy.

"Gareth er aftur á móti með langan samning við okkur og ég get fullvissað stuðningsmenn okkar um að hann verður ekki seldur."

Stuðningsmenn Spurs gleðjast vafalítið yfir þessum tíðindum en þeir eru eflaust ekki jafn kátir með þá staðreynd að Levy er ekki til í að opna veskið í janúar.