Þúsundir flýja til Tyrklands

Yfir þúsund flóttamenn hafa komið til Tyrklands frá Sýrlandi undanfarinn sólarhring. Verið er að setja upp nýjar flóttamannabúðir fyrir ört vaxandi fjölda Sýrlendinga við landamærin.

Ár var í gær liðið frá því að uppreisnin gegn Assad Sýrlandsforseta hófst. Stjórnarherinn hefur hert aðgerðir sínar gegn uppreisnarmönnum undanfarið og er talið að 46 manns hið minnsta hafi látist í gær. Mannréttindasamtök segja um tíu þúsund manns hafa látist á undanförnu ári. Sameinuðu þjóðirnar telja að um 230 þúsund manns hafi flúið heimili sín vegna ástandsins. - þeb