Stærðarinnar krókódíll situr um ferðamann

Myndband af ótrúlegum eltingaleik sundmanns og krókódíls hefur fengið mikla athygli eftir að það rataði á veraldarvefinn nú á miðvikudaginn síðastliðinn og hefur fjölmiðlarisinn Fox news meðal annars gert það að umfjöllunarefni sínu.

Ferðamaðurinn, sem staddur var í sumarfríi í Mexíkó, reynir hvað hann getur til að komast að landi svo hann endi ekki í maga krókódílsins, sem var rúmlega 3 metra langur.

Krókódíllinn var einugis örfáa metra frá manninum þegar áhorfandi náði að bægja að hættunni frá með því að grýta skriðdýrið.

Manuel Carrera deildi myndbandinu á Facebook-síðu sinni en myndskeiðið var fangað af Boca Paila-brúnni í Sian Ka‘an. Fjöldi fólks varð vitni að eftirför krókódílsins og má greinilega heyra viðbrögð þeirra í myndskeiðinu hér að neðan.

Carrera segir í færslunni með myndbandinu að heimamenn hætti sér ekki í vatnið af ótta við krókódíla svæðisins, sem lifa á matarleifum ferðamanna. Hann biðlar til allra að hætta að fóðra dýrin.

Sian Ka‘an,  sem er náttúruverndarsvæði í Tulum, rataði á heimsminjaskrá UNESCO árið 1987 en svæðið er vinsæll áningarstaður ferðamanna vegna stórbrotinnar náttúrufegurðar.

Post by Manuel Carrera.