Fjölskylduharmleikur í Stavanger - "Samfélagið hérna slegið yfir fréttunum"

Svo virðist sem tuttugu og þriggja ára piltur hafi myrt foreldra sína í Stavanger í Noregi í gærdag. Íslendingur í bænum segir samfélagið í bænum slegið yfir fréttunum.

Það var síðdegis í gær sem þrettán ára piltur hringdi í lögregluna í Stavanger og tilkynnti um hávaða og högg í íbúð hjá nágranna sínum. Lögreglan kom á staðinn, en taldi ekki ástæðu til að bregðast við.

Klukkan átta í gærkvöldi tilkynnir annar nágranni um blóðug spor fyrir utan íbúðina, sem er í Tasta-hverfinu. Atli Steinn Guðmundsson, býr í Stavanger.

„Og þá fer lögreglan þarna á staðinn og finnur látinn karlmann um sextugt og alvarlega slasaða konu með hnífstungusár. Hún deyr svo á Háskólasjúkrahúsinu í Stavanger á fjórða tímanum í nótt. Og það næsta í málinu er að einstaklingur sem er að öllum líkindum sonur þessara hjóna, tuttugu og þriggja ára, ekur framan á vöruflutningabíl á fullri ferð klukkan hálf tíu í gærkvöldi í Bjerkreim. Hann lætur lífið samstundis. Þó að lögreglan hafi ekki farið út með það ennþá að hann sé árásaraðilinn, er auðvitað freistandi að draga þá ályktun - en þeir hafa ekki viljað segja það enn þá," segir hann.

Hann segir að mikið sé fjallað um málið í norskum fjölmiðlum.

„Jájá, það eru allir norskir fjölmiðlar með þetta. Ég segi nú ekki að morð og manndráp séu daglegt brauð hér í Stavanger, það gerist þó annað slagið. Þetta er dramatískt þegar heil fjölskylda á í hlut auðvitað. Það er alveg ljóst að allt samfélagið hérna í Stavanger og nágrenni er slegið yfir þessum fréttum,“ segir hann.

„Stavanger er ekkert ósvipð höfuðborgarsvæðinu á Íslandi. Það er ein borg í miðjunni og minni sveitarfélög í kringum. Hérna eru auðvitað fíkniefni og ofbeldi, sem fylgja stærri þéttbýliskjörnum um allan heim. En þetta er óskaplega rólegt og þægilegt umhverfi að öllu jöfnu, og mjög öruggt myndi ég segja hafandi búið hérna í þrjú ár.“

Þannig að fólki er brugðið?

„Já, það er alveg klárt að þetta er stórmál á norskum mælikvarða, hvort sem um sé að ræða Osló eða þessi minni svæði.“

Umfjöllun NRK.