Megan Rapinoe vill fá Messi, Ronaldo og Zlatan með í baráttuna

Megan Rapinoe lét ekki gott tækifæri framhjá sér fara þegar hún fékk afhentan Gullbolta France Football í vikunni. Hún er enn á fullu að berjast fyrir launajafnrétti kynjanna í fótboltanum.

Megan Rapinoe átti ótrúlegt ár þar sem hún varð heimsmeistari, markadrottning og besti leikmaðurinn á HM og hefur síðan unnið allra eftirsóttustu verðlaunin þegar menn hafa verið að gera upp árið.

Það er barátta hennar utan vallar sem hefur gert hana að stórstjörnu og skilað henni miklu meiri frægð en frammistaða hennar inn á vellinum.

Megan Rapinoe vill að stórstjörnurnar karla megin, menn eins og Lionel Messi, Cristiano Ronaldo og Zlatan Ibrahimovic, leggi konum lið í baráttunni.

Rapinoe skoraði á þessar stjörnur að tala með jafnrétti og hjálpa knattspyrnukonunum að vinna upp hið gríðarlega mikla bil sem er á milli tekjum knattspyrnumanna og knattspyrnukvenna.

„Ég vil kalla: Cristiano, Lionel, Zlatan, hjálpið mér,“ sagði Megan Rapinoe. „Þessar stórstjörnur taka ekki þátt í neinu þótt að það séu svona mikið af vandamálum í karlafótboltanum,“ sagði Rapinoe.

„Óttast þeir að tapa öllu? Þeir trúa því kannski sjálfir en það er ekki rétt. Hver mun eyða nöfnum Messi eða Ronaldo úr fótboltasögunni fyrir að tala gegn kynjamisrétti eða kynþáttafordómum,“ sagði Megan Rapinoe glerhörð.

„Ég er góður leikmaður en um leið fæ ég stuðning fyrir það sem ég geri utan vallar. Fólk skilur að ég er að reyna að finna lausnir á vandamálum samfélagsins. Hugmyndin er að gefa öðrum styrk með því að tala hærra. Ég óttast ekkert svo ég segi það sem ég vil segja. Það er þreytandi að ferðast út um allt en þú þarf að vera í framlínunni ef þú vilt bæta hluti í okkar heimi,“ sagði Megan Rapinoe.