Erlent

Salmond á­kærður fyrir kyn­ferðis­brot gegn tíu konum

Atli Ísleifsson skrifar
Alex Salmond yfirgefur dómshúsið í Edinborg í morgun.
Alex Salmond yfirgefur dómshúsið í Edinborg í morgun. epa

Alex Salmond, fyrrverandi forsætisráðherra skosku heimastjórnarinnar, mætti fyrir dómara í morgun, en er ákærður um kynferðisbrot gegn tíu konum. Ákæran er í fjórtán liðum, þar sem hann er meðal annars sakaður um tilraun til nauðgunar í ráðherrabústað sínum.

Sky News greinir frá því að í ákæru segi að sumarið 2014 hafi hann þrýst konu upp að vegg í ráðherrabústaðnum Bute House í Edinborg, legið nakinn ofan á henni og reynt að nauðga.

Þá sé hann einnig sakaður um fjölda annarra kynferðis- og blygðunarsemisbrota. Eru brotin sögð hafa verið framin á tímabilinu 2008 til 2014 og á fjölda ólíkra staða, þar með talið skoska þinginu og Stirling-kastala.

Eftir þingfestingu í morgun sagði hinn 64 ára Salmond að hann neiti staðfestlega sök í öllum ákæruliðum og að hann hafi útskýrt fyrir dómara hvernig sum málin hafi atvikast.

Salmond var forsætisráðherra skosku heimastjórnarinnar frá 2007 til 2014. Hann lét af embætti eftir að Skotar samþykktu í þjóðaratkvæðagreiðslu að vera áfram hluti af Stóra-Bretlandi.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.