Erlent

MH17: Segja aðskilnaðarsinna hafa tekið við skipunum frá Rússum

Samúel Karl Ólason skrifar
298 létu lífið þegar farþegaþotan var skotin niður með rússnesku vopni yfir yfirráðasvæði aðskilnaðarinna sem Rússar styðja.
298 létu lífið þegar farþegaþotan var skotin niður með rússnesku vopni yfir yfirráðasvæði aðskilnaðarinna sem Rússar styðja. Vísir/MH17
Alþjóðlegt teymi rannsakenda sem skoðað hafa atvikið þegar malasíska flugvélin MH17 var skotin niður yfir austurhluta Úkraínu í júlí 2014 hafa opinberað upptökur símtala sem þeir segja vera á milli aðskilnaðarsinna í Úkraínu og embættismanna í Rússlandi. Upptökurnar segja rannsakendurnir að séu til marks um náið samstarf aðskilnaðarsinna við yfirvöld Rússlands.



Í yfirlýsingu frá rannsakendum segir að samskiptin hafi verið nánast dagleg og þau veki spurningar um aðkomu rússneskra embættismanna að notkun loftvarnavopnsins sem notað var til að skjóta flugvélina niður. Upptökurnar gefa einnig í skyn að aðskilnaðarsinnar hafi framfylgt skipunum yfirvalda Rússlands.

Þá kallar nefndin eftir því að aðilar sem geti varpað ljósi á samband aðskilnaðarsinna og Rússlands stígi fram.

Umrædd flugvél var á leið frá Amsterdam til Kuala Lumpur og var hún skotin niður yfir yfirráðasvæði aðskilnaðarsinna. Allir þeir sem voru um borð dóu, alls 283 farþegar og fimmtán í áhöfn. Rannsóknarnefndinni er stýrt af Hollendingum. Malasía, Ástralía, Úkraína og Belgía eru einnig aðilar að nefndinni.

Meðlimir nefndarinnar fluttu brak flugvélarinnar til Hollands þar sem það var sett saman á nýjan leik og komust þeir að þeirri niðurstöðu að hún hefði verið skotin niður með BUK-eldflaugakerfi, sem framleitt er af Rússum.

Sjá einnig: Röktu slóð Buk-kerfisins til Rússlands



Nefndin segir einnig að fyrrverandi meðlimir aðskilnaðarsinna hafi sagt rannsakendum að Leyniþjónusta Rússlands (FSB) og leyniþjónusta hersins (GRU) komi að daglegum rekstri Alþýðulýðveldis Donteks, eins og aðskilnaðarsinnar kalla yfirráðasvæði sitt.

Það hafi svo verið staðfest í áðurnefndum upptökum.

Á einni upptökunni má heyra Alexander Borodai, einn af leiðtogum aðskilnaðarsinna, segja rússneskum embættismanni að hann sé að framfylgja skipunum og verja hagsmuni Rússlands, sem hann kallar „hið eina ríki“.

Á annarri heyrist annar leiðtogi segja einum af foringjum sínum að von sé á mönnum sem „beri skipanir frá Shoygu“. Sergey Shoygu er og var þá varnarmálaráðherra Rússlands.

Segjast saklausir og hafa sagt ýmislegt annað

Rússar, sem styðja við bakið á aðskilnaðarsinnum í Úkraínu, hafa ávallt haldið fram sakleysi sínu. Sönnunargögn sem litið hafa dagsins ljós frá því að ódæðið átti sér stað hafa þó ítrekað bendlað Rússa við atvikið. Nefndin segir nú að yfirvöld Rússlands hafi alfarið neitað að vinna með þeim og svara fyrirspurnum meðlima.

Rússar hafa enn sem komið er ekki tjáð sig um þessar nýjustu vendingar.

Yfirvöld Rússlands stigu fljótt fram eftir að farþegaþotan var skotin niður og héldu blaðamannafund fjórum dögum seinna. Þar lagði Varnarmálaráðuneyti Rússlands fram ýmis gögn sem áttu að vera til marks um ýmsar kenningar hvað varðaði ódæðið.

Meðal annars áttu Úkraínumenn sjálfir að hafa skotið þotuna niður en ekki aðskilnaðarsinnar eða jafnvel rússneskir hermenn. Fyrst áttu Úkraínumenn að hafa gert það með orrustuþotu sem var á flugi nærri farþegaþotunni, samkvæmt ratsjárgögnum og myndum sem Rússar opinberuðu. Því var jafnvel haldið fram að flugmönnum þotunnar hafi verið gert að breyta um stefnu svo þær færu beint yfir átakasvæði. Það hefur reynst rangt.

Síðan þá hafa Rússar þó birt sambærileg gögn og myndir sem eiga að vera frá sama tíma og myndirnar af orrustuþotunni. Sú þota er þó hvergi sýnilegt á þeim gögnum.

Næst áttu Úkraínumenn að hafa skotið þotuna niður með BUK-kerfi sem þeir áttu. Því til stuðnings birti Vararnmálaráðuneytið gervihnattarmyndir af úkraínskri herstöð þar sem BUK-kerfið sem Úkraínumenn áttu að hafa notað átti að koma frá. Þær myndir reyndust þó ekki vera frá þeim tíma sem Rússar sögðu og þar að auki komust sérfræðingar að því að búið var að eiga við myndirnar.

Hér má lesa ítarlega grein rannsóknasamtakanna Bellingcat, þar sem farið er yfir fullyrðingar yfirvalda Rússlands í tengslum við MH-17.



Hér að neðan má svo sjá þrjú myndbönd sem rannsóknarnefndin birti árið 2016.


Tengdar fréttir




Fleiri fréttir

Sjá meira


×