Einkunnir eftir sigurinn á Moldóvu: Kolbeinn bestur

Ísland fór á topp H-riðils undankeppni EM 2020 með 3-0 sigri á Moldóvu á Laugardalsvelli í dag. Þetta var þriðji sigur íslenska liðsins í röð.

Kolbeinn Sigþórsson var í byrjunarliði Íslands í keppnisleik í fyrsta sinn síðan á EM 2016. Hann kom Íslendingum á bragðið og var heilt yfir besti leikmaður Íslands í dag.

Birkir Bjarnason kom Íslandi í 2-0 á 55. mínútu og Victor Mudrac skoraði svo sjálfsmark á 77. mínútu.

Ari Freyr Skúlason átti þátt í síðustu tveimur mörkunum og var mjög góður í leiknum.

Einkunnagjöf Vísis má sjá hér fyrir neðan.

Byrjunarlið:

Hannes Þór Halldórsson, markvörður 6

Hafði ekkert að gera nánast allan leikinn en varði vel frá Alexandru Suvorov á 83. mínútu. Hélt hreinu í þriðja sinn í undankeppninni.

Hjörtur Hermannsson, hægri bakvörður 7

Lenti ekki í neinum vandræðum í vörninni. Átti þátt í fyrsta markinu og lagði upp gott færi með fínni fyrirgjöf.

Kári Árnason, miðvörður 7

Vann alla skallabolta og leysti það litla sem hann þurfti að gera vel.

Ragnar Sigurðsson, miðvörður 7

Átti skallann sem bjó til annað markið. Átti náðugan dag í vörninni. Nálægt því að skora sjálfsmark undir lok leiks.

Ari Freyr Skúlason, vinstri bakvörður 8

Flottur leikur hjá Ara. Átti fyrirgjöfina sem skapaði þriðja markið og hornspyrnuna í öðru markinu. Öruggur með boltann og skilaði honum vel frá sér.

Arnór Ingvi Traustason, hægri kantmaður 5

Lét lítið fyrir sér fara. Vann vel en framlagið í sókninni var ekki mikið.

Aron Einar Gunnarsson, miðjumaður 7

Lagði upp gott færi fyrir Birki með frábærri sendingu. Stýrði miðjunni sem fyrr eins og herforingi.

Gylfi Þór Sigurðsson, miðjumaður 7

Var tvisvar sinnum nálægt því að skora í fyrri hálfleik. Sýndi nokkur frábær tilþrif en hefur oft verið meira áberandi.

Birkir Bjarnason, vinstri kantmaður 7

Gekk lítið upp hjá Birki í fyrri hálfleik en var miklu betri í þeim seinni. Skoraði annað mark Íslands þegar hann fylgdi eftir skalla Ragnars sem Alexi Kosalev varði. Þetta var tólfta landsliðsmark Birkis.

Kolbeinn Sigþórsson, framherji 8

Skoraði í fyrsta keppnisleik sínum í byrjunarliði Íslands síðan á EM 2016. Vantar nú aðeins tvö mörk til að jafna markamet Eiðs Smára Guðjohnsen. Vann einvígin sín í loftinu eins og venjulega.

Jón Daði Böðvarsson, framherji 7

Einstaklega fljótur að hugsa þegar hann lagði upp markið fyrir Kolbein á snyrtilegan hátt. Duglegur að vanda og lét hafa fyrir sér. Var í baráttu við Victor Mudrac þegar hann skoraði sjálfsmarkið.

Varamenn:

Emil Hallfreðsson - (Kom inn á fyrir Kolbein á 63. mínútu) 6

Öruggur og yfirvegaður. Skilaði boltanum vel frá sér.

Rúnar Már Sigurjónsson - (Kom inn á fyrir Birki á 78. mínútu)

Átti gott skot rétt framhjá marki Moldóva. Spilaði of lítið til að fá einkunn.

Viðar Örn Kjartansson - (Kom inn á fyrir Jón Daða á 84. mínútu)

Spilaði of lítið til að fá einkunn.