Arsenal á líka sinn Greenwood en Juventus og AC Milan sögð hafa mikinn áhuga

Mason Greenwood hefur stimplað sig inn hjá Manchester United þrátt fyrir að halda ekki upp á átján ára afmælið sitt fyrr en í október. Annar ungur Greenwood hefur vakið athygli en sá spilar með Arsenal.

Ensku slúðurblöðin skrifuðu í morgun um áhuga ítalskra stórliða á hinum sautján ára gamla Sam Greenwood hjá Arsenal. Bæði Juventus og AC Milan hafa sett nafn stráksins á sinn óskalista samkvæmt fréttum hjá bæði Metro og The Sun.

Sam Greenwood sló í gegn með enska sautján ára landsliðinu í sumar þar sem hann skoraði þrjú mörk í þremur leikjum í úrslitakeppni EM U17. Greenwood skoraði þar á móti Hollandi, Svíþjóð og Frakklandi.

The next British teenager to make a big European move?#Arsenal and England striker Sam Greenwood is getting plenty of attention.

Here's the gossip roundup

https://t.co/XTofMC0Hl5pic.twitter.com/LnNHoWg0ev

— BBC Sport (@BBCSport) August 29, 2019

Njósnarar stóru félaganna voru greinilega að fylgjast með og ekki bara frá Ítalíu því einnig frá félögum í þýsku deildinni.

Sam Greenwood er nýkominn til Arsenal en hann kom þangað frá Sunderland á síðasta ári. Greenwood hafði verið í tíu ár í unglingaliðum Sunderland en fannst greinilega kominn tími á að reyna fyrir sér hjá stærra liði.

Það verður fróðlegt að sjá hvort þessi erlendi áhugi á stráknum pressi meira á það að hann fái að sðila með aðalliði Arsenal en það er mikil samkeppni í framlínu Arsenal þar sem eru menn eins og þeir Pierre-Emerick Aubameyangm, Nicolas Pépé og Alexandre Lacazette.

Juventus fékk Stephy Mavididi frá Arsenal á síðasta ári og Mavididi er búinn að fá tækifæri í Seríu A.

Ivan Gazidis, framkvæmdastjóri AC Milan, þekkir líka vel til stráksins en hann var hjá Arsenal þegar félagið fékk Sam Greenwood frá Sunderland.