Allt bendir til þess að brasilíski knattspyrnumaðurinn Philippe Coutinho verði kynntur sem nýr leikmaður Þýskalandsmeistara Bayern Munchen á morgun.



Coutinho yfirgaf Liverpool til að ganga í raðir Barcelona í ársbyrjun 2018 og talaði þá um Barcelona sem félag drauma sinna. Nú virðist hann hins vegar vera að yfirgefa Katalóniurisann fyrir þýsku meistarana.

Philippe Coutinho leaving the Barmherzige Brüder Hospital in Munich today after his Bayern medical [ @itstheicebird] pic.twitter.com/1EJ0iFmdc6

— Bayern & Germany (@iMiaSanMia) August 18, 2019

Coutinho var ekki í leikmannahópi Barcelona þegar liðið beið lægri hlut fyrir Athletic Bilbao í 1.umferð La Liga á föstudagskvöld og var mættur til Munchen í morgun.



Samkvæmt fréttum frá Þýskalandi gekkst Coutinho undir læknisskoðun í dag og ef ekkert slæmt hefur komið í ljós þar má ætla að hann verði kynntur til leiks hjá Þýskalandsmeisturunum á morgun.



Coutinho hefur skorað 21 mark í 76 leikjum með Barcelona en hann mun verða lánaður fyrst um sinn með ákvæði um forkaupsrétt Bayern á þessum 27 ára gamla leikmanni.