Flest bendir til þess að Rafa Benítez yfirgefi Newcastle United þegar samningur hans við félagið rennur út um næstu helgi.



Ekkert hefur þokast í viðræðum Benítez við Newcastle um nýjan samning og því er Spánverjinn væntanlega á útleið.



Benítez tók við Newcastle í mars 2016. Honum tókst ekki að bjarga liðinu frá falli úr ensku úrvalsdeildinni þá um vorið en stýrði því til sigurs í B-deildinni tímabilið 2016-17.



Síðustu tvö tímabil hefur Newcastle svo haldið sér nokkuð örugglega í ensku úrvalsdeildinni.



Benítez er í miklum metum hjá stuðningsmönnum Newcastle sem vilja ólmir halda Spánverjanum hjá félaginu.