Fulltrúar frá Rannsóknarnefnd samgönguslysa auk rannsóknarlögreglumanna frá tæknideild Lögreglunnar á Suðurlandi og höfuðborgarsvæðisins hafa lokið vettvangsrannsókn í Fljótshlíð þar sem flugvél skall til jarðar í gærkvöldi.



Fimm voru í vélinni. Þrír létust og tveir slösuðust alvarlega en þeir voru fluttir með þyrlu Landhelgisgæslunnar á Landspítalann í Fossvogi. Samkvæmt upplýsingum frá Lögreglunni á Suðurlandi eru líðan þeirra stöðug.



Flak flugvélarinnar hefur verið flutt af vettvangi og staðfesti Rangar Guðmundsson, fulltrúi Rannsóknarnefndar samgönguslysa, að rannsókn á vettvangi væri lokið.



Ekki liggur ljóst fyrir með hvaða hætti slysið varð en frá því í gærkvöldi hefur verið rætt við vitni og aðstandendur fólksins. Viðbragðsteymi Rauða kross Íslands var virkjað og fékk fólkið sálrænan stuðning.



Eins og áður hefur komið fram kom eldur upp í vélinni þegar hún skall til jarðar. Á fimmta tug slökkviliðs- og sjúkraflutningamanna, lögreglu og fleiri aðila tóku þátt í aðgerðum í gærkvöldi auk tveggja áhafna á þyrlum Landhelgisgæslunnar, TF-LIF og TF-EIR.