Loksins komið að því að ljúka Dettifossvegi
Meira en áratug eftir að framkvæmdir hófust sér loksins fyrir endann á lagningu nýs Dettifossvegar. Tilboð í gerð síðasta áfangans hafa nú verið opnuð hjá Vegagerðinni og er reiknað með verklokum eftir tvö ár. Sagt var frá tilboðunum í frétt Stöðvar 2.
Gerð nýs Dettifossvegar hófst árið 2008 og voru þá vonir bundnar við að lagningu þessa 55 kílómetra vegar myndi ljúka á nokkrum árum. Fyrsti áfanginn var frá hringveginum um Mývatnsöræfi að Dettifossi en með honum varð vesturbakkinn helsta aðkomuleið ferðamanna að fossinum í stað austurbakkans.
Framhald verksins lenti hins vegar reglulega í niðurskurði og sumarið 2016 var helmingur vegarins ennþá niðurgrafinn moldarslóði. Fyrir ferðaþjónustu í Norður-Þingeyjarsýslu var hálfur Dettifossvegur sagður verri en enginn en fleiri áfangar hafa síðan bæst við frá árinu 2014.
Sjá nánar hér: Hálfur Dettifossvegur verri en enginn.
Og núna er loksins komið að því að ljúka tengingunni norður í Ásbyrgi og einnig þeim köflum sem greiða leið ferðamanna að fleiri náttúruperlum í Jökulsárgljúfrum, eins og Hólmatungum, Vesturdal og Hljóðaklettum.
Tilboð í lokaáfangana hafa nú verið opnuð en kostnaðaráætlun Vegagerðarinnar hljóðaði upp á 850 milljónir króna. Aðeins bárust tvö tilboð; frá G. Hjálmarssyni á Akureyri upp á 902 milljónir króna, sex prósent yfir kostnaðaráætlun, og frá Þ.S. verktökum á Egilsstöðum, upp á 987 milljónir króna, eða 16 prósent yfir áætlun.
Í verkinu felst að leggja burðarlag og klæðingu á 7,2 km kafla á Dettifossvegi ofan Vesturdals, sem byggður var upp í fyrra, og byggja nýjan 4,2 km langan veg neðan Vesturdals.
Ennfremur að leggja þrjá nýja tengivegi út frá Dettifossvegi; 2,7 km langan veg niður í Hólmatungur, 1,6 km langan veg niður í Vesturdal og 1,5 km langan veg upp á Langavatnshöfða. Auk þess skal gera nokkra áningarstaði.
Líklegt má telja að Vegagerðin gangi til viðræðna við lægstbjóðanda, G. Hjálmarsson, en verktakinn sá meðal annars um stærsta hluta jarðvinnu í kringum Þeistareykjavirkjun.
Samkvæmt upplýsingum Hauks Jónssonar, deildarstjóra Vegagerðarinnar á Norðursvæði Vegagerðarinnar er reiknað með verklokum árið 2021.
Hér má sjá frétt Stöðvar 2:
Tengdar fréttir
Demantshringurinn virki sem segull fyrir Norðurland
Setja á aukinn kraft í að markaðssetja Demantshringinn svokallaða á Norðurlandi. Forsenda þess er að Dettifossvegur verði uppbyggður og fær öllum bílum yfir vetrartímann.
Dettifossvegur "niðurgrafinn moldarvegur“ sem annar engan veginn eftirspurn
Húsavíkurstofa, sem er sameiginlegur vettvangur ferðaþjónustuaðila á Húsavík, hefur sent frá sér ályktun vegna niðurskurðar á samgönguáætlun.
Svona er slóðinn sem heitir Dettifossvegur
Íbúar við Öxarfjörð hafa brugðist hart við áformum stjórnvalda að fresta lagningu nýs Dettifossvegar.
Niðurskurðarhnífur skar Dettifossveg
Bundið slitlag sem bætist við þjóðvegakerfið á þessu ári verður að öllum líkindum það minnsta í nærri fjörutíu ár.
Hálfur Dettifossvegur verri en enginn
Ferðaþjónustuaðilar á norðausturhorni landsins óttast hrun, þegar bara hálfur Dettifossvegur verður opnaður meðfram Jökulsárgljúfrum næsta sumar, og segja að ferðamennirnir muni sleppa Ásbyrgi og byggðunum við norðurströndina.
