PSG fagnaði franska meistaratitlinum með stæl þegar liðið lagði Mónakó að velli á heimavelli sínum í París í kvöld.

Það varð ljóst fyrr í dag að Paris Saint-Germain var Frakklandsmeistari án þess að leikmenn PSG hefðu reimað á sig skóna. Markalaust jafntefli Lille og Toulouse tryggði PSG titilinn sama hvað myndi gerast í kvöld.

Nýkrýndir meistarar sýndu úr hverju þeir eru gerðir og þá sérstaklega hinn ungi Kylian Mbappe sem skoraði þrennu í leiknum.

Mbappe heldur áfram að sýna það og sanna að hann er einn besti framherji heims. Það tók hann aðeins korter að koma marki í leikinn í París.

Á 38. mínútu bæti hann öðru marki sínu við og í upphafi seinni hálfleiks kom það þriðja og þrennan fullkomnuð.

Eftir það var leikurinn í raun úti. Gestirnir frá Mónakó náðu í sárabótamark á 80. mínútu en það kom of seint til þess að ná upp neinni endurkomu og lauk leiknum 3-1.