Sautján ára stúlka í Utah-fylki í Bandaríkjunum olli árekstri eftir að hafa reynt við svokallaða „Bird Box-áskorun“ undir stýri. Áskorunin er byggð á samnefndri kvikmynd úr smiðju Netflix en persónur myndarinnar neyðast allar til að hafa bundið fyrir augun.

Ökumaðurinn og sextán ára farþegi hennar sluppu án alvarlegra meiðsla en stúlkan hafði dregið húfu sína niður fyrir augu á meðan hún ók bílnum. Lögregla í bænum Layton hefur biðlað til íbúa að reyna ekki við þessa áskorun þar sem hún stefni bæði lífi þátttakenda og annara vegfarenda í hættu. 

Bird Box Challenge while driving...predictable result. This happened on Monday as a result of the driver covering her eyes while driving on Layton Parkway. Luckily no injuries. pic.twitter.com/4DvYzrmDA2
— Layton Police (@laytonpolice) 11 January 2019

Stúlkan sagði í fyrstu að hún hafi verið annars hugar við aksturinn eftir spjall við vinkonu sína sem hafi valdið því að hún missti stjórn á bílnum. Vitnisburður farþega í hinum bílnum sem og vitna urðu hins vegar til þess að lögregla tengdi slysið við áskorunina sem hefur farið eins og eldur í sinu um Internetið. 

Í byrjun ársins biðlaði Netflix til áhorfenda sinna að fara varlega við framkvæmd áskorunarinnar eftir að myndbönd fóru að birtast á samfélagsmiðlum á borð við Twitter og Instagram. 

„Ég trúi ekki að ég þurfi að taka þetta fram, en: GERIÐ ÞAÐ EKKI MEIÐA YKKUR VIÐ ÞESSA BIRD BOX-ÁSKORUN,“ sagði í Twitter-færslu streymiveitunar.

Can’t believe I have to say this, but: PLEASE DO NOT HURT YOURSELVES WITH THIS BIRD BOX CHALLENGE. We don’t know how this started, and we appreciate the love, but Boy and Girl have just one wish for 2019 and it is that you not end up in the hospital due to memes.
— Netflix US (@netflix) 2 January 2019