Fótbolti

Norðmenn í skýjunum með ráðningu Solskjær: Okkar ferð til tunglsins

Óskar Ófeigur Jónsson skrifar
Ole Gunnar Solskjær.
Ole Gunnar Solskjær. Vísir/Getty
Það er talað um fátt meira í Noregi í dag en það að Ole Gunnar Solskjær er tekinn við sem nýr knattspyrnustjóri Manchester United.

Fréttamiðlar eru fullir af öllum mögulegum vinklum á ráðningu Solskjær sem og viðbrögðum heimsins við ráðningunni. Svo fór allt á flug þegar Norðmenn héldu að þeir fengju ekki að sjá fyrsta heimaleikinn í beinni.

BBC vakti líka athygli á einum norskum sjónvarpsmanni á æfingasvæði Manchester United sem tók sjálfan sig upp á meðan hann hélt á skiltinu „Honk if you love Solskjaer“ eða „Flautaðu ef þú elskar Solskjar“. Norskara verður það nú varla.





Stuðningsmannaklúbbur Manchester United í Noregi hefur líka fengið fullt af nýjum meðlimum og sala á ferðum til Manchester hefur aukist mikið.

„Stærstu fréttir í sögu norsks fótbolta“ var uppslátturinn í Dagsavisen og þar bættu menn við:

„Norðmaður tekur við sem knattspyrnustjóri hjá frægasta fótboltafélagi heims. Nei, ekki besta liðið í heimi en það frægasta og sögulegasta. Þetta er stærsta starfið í heimi,“ skrifaði blaðamaður Dagsavisen.

„Manchester United þarf ekki á manni að halda sem stendur í vegi fyrir öllum. Þeir þurfa vinalegan sál. Þeir þurfa einhvern sem fær alla til að vinna saman. Þeir þurfa einhvern sem setur aldrei sjálfan sig á undan félaginu. Þeir þurfa á goðsögn að halda,“ skrifaði blaðamaður Dagbladet.

Dagbladet líkir líka þessu skrefi hjá Ole Gunnar Solskjær við það að norskur fótbolti hafi komist til tunglsins.





Gamli fótboltamaðurinn Mini Jakobsen var líka stoltur að vera Norðmaður. „Nú eigum við besta handboltamann heims, bestu fótboltakonu heims og nú höfðum við knattspyrnustjóra hjá stærsta félagi heims. Alveg eðlilegt,“ skrifaði Mini Jakobsen.

John Arne Riise, fyrrum leikmaður Liverpool, var líka sáttur með landa sinn. „Þetta er alveg geðveikt. Ég er svo stoltur af honum, bæði sem Norðmaður og maður sem spilaði með og á móti honum. Þetta er frábært tækifæri fyrir hann. Þetta sýnir líka að allt er mögulegt séu menn tilbúnir að leggja mikið á sig. Ég óska honum alls hins besta,“ skrifaði John Arne Riise.

Erna Solberg, forsætisráðherra Noregs, er ein af þeim sem hefur fagnað á Twitter. „Frábær dagur fyrir norskan fótbolta. Gangi þér vel að hafa stjórn á Rauðu djöflunum,“ skrifaði Erna Solberg.

Það var líka mikil drama þegar það kom í ljós að fyrsti heimaleikur Ole Gunnar Solskjær yrði mögulega ekki sýndur beint í norsku sjónvarpi. TV2 hafði valið leik Liverpool og Newcastle frekar en leik Manchester United og Huddersfield.

Forráðamenn TV2 ákváðu að breyta um leik en þeir urðu að velja á milli leiks með Liverpool og Manchester United sem eru mjög vinsæl félög í Noregi alveg eins og á Íslandi.

Vinsældir Manchester United hafa aftur á móti rokið upp eftir þessa ráðningu þeirra manns.

Enski boltinn

Mest lesið


Fleiri fréttir

Sjá meira


×

Mest lesið