Fótbolti

Albert sló metið sem Ríkharður var búinn að eiga í 66 ár

Óskar Ófeigur Jónsson skrifar
Albert Guðmundsson í leiknum á móti Indónesíu.
Albert Guðmundsson í leiknum á móti Indónesíu. Vísir/AFP
66 ár, 6 mánuðir og 16 dagar. Það var tíminn sem Ríkharður Jónsson átti metið yfir að vera yngsti íslenski fótboltamaðurinn til að skora þrennu í A-landsleik.

Ríkharður átti metið allt þar til í gær að Albert Guðmundsson sló það með því að skora þrennu í 4-1 sigri á Indónesíu.

Albert Guðmundsson er fæddur um miðjan júnímánuð 1997 og er því ekki enn búinn að halda upp á 21 árs afmælið sitt. Þetta var líka aðeins hans þriðji A-landsleikur.

Albert var ekki í byrjunarliðinu en kom inná snemma leiks. Hann skoraði fyrsta markið sitt á lokasekúndu fyrri hálfleiks en í seinni hálfleik skoraði hann fyrst úr vítaspyrnu sem hann fékk sjálfur og svo eftir mikinn og langan sprett inn í vítateiginn.

Öll mörkin má sjá hér að neðan en leikurinn var sýndur á RÚV.




Albert lagði upp fjögur mörk íslenska liðsins í 6-0 sigrinum í fyrri leiknum en fór þá illa með nokkur góð færi. Hann var hinsvegar búinn að finna skotskóna sína í seinni leiknum. 

Ríkharður heitinn Jónsson skoraði 17 mörk í 33 landsleikjum á árunum 1947 til 1965. Hér fylgist hann með sínum mönnum á Skaganum.Vísir/Pjetur
Ríkharður Jónsson var aðeins 21 árs gamall og sjö mánuðum betur þeagr hann skoraði fernu á móti Svíum sumarið 1951. 

Ríkharður á því enn metið yfir þann yngsta sem hefur skorað fernu í A-landsleik. Ríkharður hefur verið að missa markametin sín á síðustu árum en ætti að geta haldið því meti eitthvað lengur. 

Auk þess að bæta þetta met þá varð Albert ennfremur fyrsti varamaðurinn sem skorar þrennu fyrir íslenska landsliðið.

Yngstu leikmenn til að skora þrennu í A-landsleik karla:

20 ára og 7 mánaða

Albert Guðmundsson - 3 mörk á móti Indónesíu 14. janúar 2018

21 árs, 7 mánaða og 17 daga

Ríkharður Jónsson - 4 mörk á móti Svíþjóð 29. júní 1951

22 ára, 10 mánaða og 11 daga

Jóhann Berg Guðmundsson - 3 mörk á móti Sviss 6. september 2013

22 ára, 10 mánaða og 26 daga

Ragnar Margeirsson - 3 mörk á móti Færeyjum 10. júlí 1985

23 ára, 5 mánaða og 9 daga 

Teitur Þórðarson - 3 mörk á móti Færeyjum 23. júní 1975

HM 2018 í Rússlandi

Mest lesið


Fleiri fréttir

Sjá meira


Mest lesið


Velkomin á Vísi. Þessi vefur notar vafrakökur. Sjá nánar.