Jesus: Fjarvera Sane viðvörun fyrir okkur alla

Leroy Sane var ekki í leikmannahópi Manchester City um helgina. Gabriel Jesus segir það vera viðvörun til hinna leikmannanna.

Sane var valinn besti ungi leikmaður ensku úrvalsdeildarinnar á síðasta tímabili en hann hefur ekki verið í byrjunarliði City í neinum af fyrstu fjórum leikjum liðsins.

Pep Guardiola sagði að það hafi verið taktísk ákvörðun að hafa Sane ekki í hópnum en fjölmiðlar á Englandi segja stjórann ekki ánægðan með hugarfar Sane á æfingum.

„Það er eðlilegt í svona stóru liði að það sé ekki pláss fyrir alla. Í dag var það Sane en í framtíðinni gæti það verið ég eða einhver hinna leikmannanna,“ sagði Jesus eftir leik City og Newcastle á laugardag.

„Það vita allir hversu góður Sane er og hversu mikilvægur hann er fyrir þetta félag. En þetta er byrjunin á tímabilinu og það er eðlilegt að sumir leikmenn hafi byrjað af meiri krafti en aðrir.“

City vann 2-1 sigur á Newcastle og er í fjórða sæti eftir fjórar umferðir, með 10 stig og enn án taps.