Hvað vitum við um Qarabag?

Hannes Þór Halldórsson gekk í raðir Qarabag frá Aserbaídsjan í gær en hann kemur til liðsins frá danska félaginu Randers. Hannes hefur varið mark íslenska landsliðsins undanfarin ár en hvað vitum við um þetta lið, Qarabag?

Liðið hefur unnið deildina í Aserbaídsjan fimm ár í röð. Þeir unnu deildina í fyrra með sextán stigum og eru lang stærsta liðið um þessar mundir í Aserbaídsjan eftir að hafa tekið fram úr Neftci Bakú.

Þjálfarinn er frá Aserbaídsjan. Hann heitir Gurban Gurbanov en hann hefur þjálfað liðið frá því 2008. Hann tók einnig við þjálfun landsliðs Aserbaídsjan í fyrra en hann á tæptan tuttugu ára feril sem leikmaður í heimalandinu. Goðsögn.

Í fyrra sló Qarabag út FCK í forkeppni Meistaradeildar Evrópu og tryggði sér þar með sæti í riðlakeppni Meistaradeildarinnar. Þar var liðið með Atletico Madrid, Chelsea og Roma í riðli en liðið öðlaðist ekki bara þáttökurétt í Meistaradeildinni heldur einnig gífurlegir fjármunir.

Þeir töpuðu báðum leikjunum gegn Roma og Chelsea en náðu jafntefli í báðum leikjunum gegn Atletico Madrid sem gerði það að verkum að Atletico fór ekki áfram. Markalaust jafntefli í Aserbaídsjan og 1-1 á Spáni.

Nú er liðið í svipaðri stöðu. Liðið mætir Olimpija í forkeppni Meistaradeildarinnar en Olimpija er frá Slóveníu. Fari liðið í gegnum þá tvo leiki spila þeir aftur í riðlakeppni Meistaradeildarinnar.

Í samtali við Fótbolta.net sagði þó Hannes að hann verði ekki klár í fyrri leikinn vegna meiðsla en hann var einnig tæpur vegna þessa sömu meiðsla er hann lék með Íslandi á HM.

Liðið spilar deildarleiki sína á Azersun-leikvanginum sem tekur 5800 manns í sæti. Leikvangurinn opnaði 2015 og hefur liðið spilað þar síðan en þegar liðið spilar „stærri“ leiki færa þeir sig yfir til Bakú.

Þar spila þeir á Ólympíuleikvanginum í Bakú sem tekur tæplega 70 þúsund manns. Rétt rúmlega 67 þúsund áhorfendur mættu á leik liðsins gegn Róma síðasta vetur og það gæti verið frábær upplifun fyrir Hannes fái hann svipaðan leik í vetur.

Leikmannahópurinn er að mestu leyti byggður upp á leikmönnum frá Aserbaídsjan en þó eru leikmenn frá öðrum löndum; til að mynda Frakklandi, Spáni og Króatíu. í jafnteflinu gegn Atletico Madrid á útivelli spiluðu leikmenn frá sjö þjóðernum.

Það er ljóst að Hannes er að fara í risaklúbb. Félagið leggur mikið upp úr Evrópukeppnum og það er vonandi að liðið slái út Olimpija svo við sjáum Hannes í Meistaradeildinni í vetur.

A new adventure with @FKQarabaghEN
Exciting times ahead! pic.twitter.com/7ggcNuUxlt

— Hannes Halldórsson (@hanneshalldors) July 4, 2018