Kveðja til Strákanna okkar: „Við erum öll með ykkur í anda“

Ríkisstjórn Íslands hefur sent landsliðshópnum sem nú leggur lokahönd á undirbúninginn fyrir leik Íslands og Argentínu kveðju.

„Ég vil að þið vitið að þjóðin öll er ótrúlega stolt af ykkar góða árangri,“ segir í kveðjunni sem hefst á orðunum „Kæru knattspyrnukappar.“

„Sá hluti þjóðarinnar sem ekki er þegar mættur til Rússlands til að hvetja ykkur til dáða mun án efa sitja límdur fyrir framan sjónvarpsskjáinn og hvetja ykkur áfram af jafn miklum krafti að heiman,“ segir ennfremur í kveðjunni.

Undir kveðjuna skrifar Katrín Jakobsdóttir, forsætisráðherra Íslands.

„Við erum öll með ykkur í anda. Áfram Ísland,“ segir að lokum.