Gera ráð fyrir að leit haldi áfram á morgun

Leit stendur enn yfir að manninum sem fór í Ölfusá í nótt. Miðað er við að leitarhópar klári sín verkefni og svo verði staðan tekin í kvöld. Þá er búist við því að leit verði haldið áfram á morgun.

Sjá einnig: Níutíu björgunarsveitarmenn leita mannsins í Ölfusá

Davíð Már Bjarnason, upplýsingafulltrúi Landsbjargar, segir í samtali við Vísi á fjórða tímanum að enn séu hópar úti að leita við Ölfusá. Hann getur ekki sagt til um það hvenær leit verði hætt í dag en miðað er við að hóparnir klári verkefni sem þeim hefur verið útdeilt.

„Eins og staðan er núna þá er planið að það verði áframhaldandi leit í fyrramálið. Svo verður staðan tekin í lok dags, eða þessarar lotu sem er í gangi núna,“ segir Davíð en gerir ráð fyrir að leitað verði fram á kvöld.

„En á hvaða forsendum verður leitað á morgun er svolítið óljóst. Það fer bara eftir því hvernig þessi dagur endar,“ bætir hann við.

Þá hefur fækkað í björgunarsveitarmannahópunum að sögn Davíðs en þeir sem hafa verið lengst að leita eru að tínast heim. Þeir sem komu upp úr hádegi verða þó eitthvað áfram en verkefni leitarmanna eru enn fjölbreytt – þó að skilyrði séu erfið eftir sem áður.

„Bátarnir sem fóru upp á Þingvelli eru komnir aftur og einhverjir þeirra eru úti núna en þetta eru mest gönguhópar. Svo eru einhverjir á hjólum en mér skilst að það sé enn þá þannig veður að það er ekkert hægt að nota dróna,“ segir Davíð.

Um níutíu björgunarsveitarmenn tóku þátt í leitinni við Ölfusá þegar mest var í dag. Leitaraðstæður hafa verið krefjandi eins og áður sagði en mikil úrkoma og vindur er á svæðinu auk þess sem Ölfusá er vatnsmikil vegna rigninga síðustu daga.

Þá hefur verið mikill erill hjá björgunarmönnum í dag en skömmu eftir hádegi var hópur björgunarsveitarmanna kallaður út að Þingvallavatni þar sem tveir ferðamenn höfðu lent í vatninu. Þeir voru fluttir á sjúkrahús og eru sagðir í lífshættu.