Vilja félagsíbúðir á kostnaðarverði og rafknúið lestarkerfi

Alþýðufylkingin í Reykjavík boðar félagslegt húsnæði fyrir alla sem vilja, fleiri störf á vegum borgarinnar og rafknúið lestarkerfi, ofan jarðar og neðan. Flokkurinn kynnti stefnumál sín í morgun en oddvitinn segir byltingu alþýðunnar óhjákvæmilega fyrr eða síðar.

Frambjóðendur í efstu þrjú sætin, þau Þorvaldur Þorvaldsson, Tamila Gamez Garcell og Vésteinn Valgarðsson kynntu stefnumálin í Friðarhúsinu við Njálsgötu í morgun. Þorvaldur og Vésteinn skörtuðu rauðum bolum með andliti Karls Marx, en oddvitinn Þorvaldur, sem jafnframt er formaður flokksins, boðar nýja sýn í borginni.

„Í raun og veru að minnka markaðsvæðinguna, berjast gegn henni og auka vægi félagslegra lausna," segir Þorvaldur.

Útgerð og ræktun matvæla á vegum borgarinnar

Þannig vill flokkurinn bjóða öllum sem vilja og þurfa félagslegt húsnæði á vegum borgarinnar, ekki bara þeim verst stöddu. Jafnframt vill Þorvaldur að sveitarfélagið hafi fleiri störf á sínum snærum.

„Það getur verið útgerð, það getur verið ræktun matvæla, það getur verið fjölmargt. Við viljum t.d. líka að borgin taki til sín þau störf sem hún hefur útvistað áður.“

Í samgöngumálum vill flokkurinn efla almenningssamgöngur, án þess þó að þvinga fólk úr bílum sínum. Til lengri tíma litið telur Þorvaldur rétt að ganga afar langt í uppbyggingu slíkra samgangna.

„Við viljum þegar lengra lætur ganga lengra. Við viljum koma á rafknúnu lestarkerfi, ofan- og neðanjarðar eftir atvikum og landsháttum.“

Hann segir borgaryfirvöld eiga að vinna fyrir fólkið og berjast gegn fátækt og misskiptingu. Hann telur aðeins tímaspursmál hvenær alþýðan rísi gegn auðvaldinu.

„Bylting alþýðunnar er auðvitað óhjákvæmileg til þess að lífið á jörðinni geti haldið áfram mikið lengur,“ segir Þorvaldur að lokum.