Innlent

Leitað að þjóðlegum réttum Íslendinga

Samúel Karl Ólason skrifar
"Sitt sýnist hverjum. Margir vísa til hefða og aðrir vilja meina að við eigum að nota þessi hráfeni sem við búum við í dag og gefa þessu nútímalegt tvist.“
"Sitt sýnist hverjum. Margir vísa til hefða og aðrir vilja meina að við eigum að nota þessi hráfeni sem við búum við í dag og gefa þessu nútímalegt tvist.“

Matarauður Íslands og Hótel- og matvælaskólinn hafa efnt til hugmynda- og uppskriftasamkeppni um þjóðlega rétti við þjóðvegina okkar. Keppnin felur í sér að finna þjóðlega íslenska rétti sem byggja á íslensku hráefni og matarmenningu. Þó geta réttirnir verið innblásnir af samtímanum þar sem Íslendingar hafa nú aðgang að fjölbreyttari hráefnum en áður og taki meira tillit til hollustu.

„Tökum höndum saman og tengjum umræður næstu daga við íslenskt hráefni og matarmenningu. Deilum matarminningum með hvert öðru og sjáum hvaða hugmyndir þjóðin kemur með,“ segir í yfirlýsingu frá forsvarsmönnum keppninnar. „Grúskaðu í gömlum uppskriftum, lestu þér til á vefsíðu Matarauðs eða láttu hugmyndaflugið ráða. Tölum um matarminningar hvert við annað og sér í lagi börnin því þannig varðveitum við þekkingu um matarhefðir.“

Keppnin mun standa yfir frá deginum í dag, 18. apríl, til 1. maí og mega allir taka þátt. Upplýsingar um hvernig tekið er þátt í keppninni má finna hér á vef Matarauðs.

Brynja Laxdal, verkefnastjóri Matarauðs Íslands, segir að keppnin hafi orðið til úr þeirri löngun að spyrja Íslendinga hvað þeir teldu vera þjóðlegan rétt.

„Sitt sýnist hverjum. Margir vísa til hefða og aðrir vilja meina að við eigum að nota þessi hráfeni sem við búum við í dag og gefa þessu nútímalegt tvist,“ segir Brynja í samtali við Vísi. Einnig væri markmiðið að rifja upp matarminningar Íslendinga.

Hún sagðist líka hafa heyrt kvartanir um að ekki væri nægilega fjölbreytt úrval á mat hringinn í kringum landið og því hafi veitingahús um landið allt verið fengin í samstarf.

Að keppninni lokinni mun Hótel- og matvælaskólinn elda og reiða fram fimmtán valda rétti úr innsendum hugmyndum fyrir dómnefnd. Fimm af þeim réttum munu svo standa upp úr sem vinningsréttir. Veitingahús í samstarfi við keppnina munu síðan velja einn af réttunum fimmtán á matseðil sinn í sumar.

Dómnefnd skipar Ragnar Wessman frá Hótel- og Matvælaskólanum, Fanney Dóra Sigurjónsdóttir yfirmatreiðslumaður, Áslaug Snorradóttir ljósmyndari og matarhönnuður, Dominique Plédel Jónsson f.h. neytendasamtakanna og Slow Food. Svo fáum við einn spennandi leynigest í dómnefndina líka.

Viðurkenning og verðlaun
1. verðlaun: Gjafabréf Air Iceland Connect, Matarkarfa með vörum frá bændum í Beint frá Býli og Mjólkursamsölunni og kokkasvunta
2. verðlaun: Matarkarfa með vörum frá bændum í Beint frá Býli og Mjólkursamsölunni og kokkasvunta
3. verðlaun: Matarkarfa með vörum frá bændum í Beint frá Býli og Mjólkursamsölunni og kokkasvunta
4.- 5. verðlaun: Matarkarfa með vörum frá bændum í Beint frá Býli og Mjólkursamsölunni og kokkasvunta



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.