Dulnefni Stellu stoppi ekki greiðslur

Settur umboðsmaður Alþingis mælist til þess að bókasafnssjóður leysi efnislega úr máli Stellu Blómkvist leiti höfundurinn á ný til sjóðsins.

Um árabil hefur einstaklingur skrifað bækur undir dulnefninu Stella Blómkvist. Höfundurinn hefur yfir fjórtán ára tímabil sent erindi til sjóðsins og spurt um rétt sinn til greiðslna á grundvelli laga um bókmenntir. Svar sjóðsins til höfundarins var að til að fá afgreiðslu þyrfti umsókninni að fylgja nafn og kennitala.

Í kvörtun höfundarins var því haldið fram að með þessari afstöðu nefndarinnar væri hann settur í þá stöðu að þurfa að velja á milli þess að viðhalda nafnleyndinni og lögbundins réttar til greiðslna fyrir afnot á bókum hans.

Settur umboðsmaður taldi skilyrði sjóðsins fela í sér of fortakslausar kröfur til sönnunar sem ekki væru í samræmi við lög. Höfundurinn gæti mögulega sýnt fram á með öðrum hætti en nafni og kennitölu að hann ætti rétt á greiðslum úr sjóðnum.